Strandveiðisjómaður lést

Frá þessu greinir Lögreglan á Vestfjörðum. Fyrr í dag var greint frá því að bátur mannsins hefði sokkið á tólfta tímanum í morgun með einn innanborðs.

Í tilkynningu frá Landhelgisgæslunni sagði að skipstjóri fiskibáts í grenndinni hefði haft samband við stjórnstöð Landhelgisgæslunnar og tilkynnt að báturinn væri sokkinn og að einn maður væri í sjónum.

Þyrla Landhelgisgæslunnar og áhöfnin á björgunarskipinu Verði II hefðu verið kallaðar út á mesta forgangi. Þá hefðu öll skip á svæðinu verið beðin um að halda á staðinn. Áhöfnin á björgunarskipinu hefði verið fyrst viðbragðsaðila á vettvang og náð manninum úr sjónum. Hann hefði verið fluttur með björgunarskipinu til Patreksfjarðar.

Við komuna þangað var hann úrskurðaður látinn. Samkvæmt tilkynningu frá lögreglunni á Vestfjörðum er ekki unnt að birta nafn hins látna að svo stöddu en samband hefur verið haft við nánustu aðstandendur vegna málsins.

Þar kemur einnig fram að Rauði krossinn hafi verið virkjaður í því skyni að veita þeim sem að málinu komu viðeigandi aðstoð. Lögreglan á Vestfjörðum fer með rannsókn málsins og er Rannsóknarnefnd samgönguslysa kunnugt um það.