Opnaði Insta­gram og sá að hún væri á leiðinni á EM í Sviss

„Þetta er mjög stórt og mjög gaman,“ segir Amanda sem býr að reynslunni sem hún fékk á fyrsta stór­mótinu með Ís­landi. Amanda hefur verið að glíma við meiðsli fyrr á árinu.

„Ég hef verið að eiga við þessi meiðsli síðustu mánuði en núna er ég bara klár að fullu og til­búin í mótið.“

Baráttan við meiðslin urðu þess valdandi að á einum tíma­punkti taldi hún óvíst hvort EM væri raun­hæfur mögu­leiki fyrir hana.

„Þetta var svolítið skrítið því það var ekki alveg vitað hversu langan tíma það myndi taka mig að komast á rétt skrið aftur. Ég var alveg smá stressuð en hef nýtt tímann vel, verið dug­leg að æfa. Það er bara mjög gott að vera komin hingað.“

Hún frétti af því á sam­félags­miðlum að hún væri í EM hópnum.

„Ég sá það bara á Insta­gram en hafði talað við Þor­stein lands­liðsþjálfara tveimur dögum áður. En sá þetta svo á Insta­gram daginn sem hópurinn var kynntur. Þetta er mjög stórt og ég er mjög spennt fyrir þessu móti.“

Ís­lenska liðið hefur undir­búið sig vel. Fyrst í Serbíu þar sem æft var í miklum hita og spilaður æfingar­leikur við heima­konur í leik sem vannst. Liðið er nú mætt til Thun í Sviss og heldur áfram að æfa og keppa í miklum hita. Amanda metur stemninguna í hópnum góða.

„Við höfum undir­búið okkur mjög vel, höfum tekið góðar æfingar og fundi. Við erum til­búnar í þetta.“

Allt sé til alls hjá liðinu bæði á hótel- og æfinga­svæði.

„Þetta er bara geggjað. Það fer mjög vel um okkur hér.“

Ís­land mætir Finn­landi í fyrsta leik liðanna á EM í Sviss annað kvöld klukkan fjögur að ís­lenskum tíma. Leiknum verður lýst í beinni textalýsingu hér á Vísi og gerð góð skil bæði fyrir og eftir leik.