Fótbolti

Ungur Njarðvíkingur fékk hjálp frá systur sinni til að heiðra minningu Jota

Óskar Ófeigur Jónsson skrifar
Jón Ingi Davíðson fagnar fyrsta marki sínu en hann átti eftir að skora þrjú í viðbóta. Til vinstri er Diogo Jota heitinn.
Jón Ingi Davíðson fagnar fyrsta marki sínu en hann átti eftir að skora þrjú í viðbóta. Til vinstri er Diogo Jota heitinn. Getty/ Andrew Powell/Davíð Ingi Jóhannsson

Það eru ekki aðeins erlendir fótboltamenn sem hafa minnst Liverpool mannsins Digoo Jota inn á vellinum á síðustu dögum. Ungur Njarðvíkingur vildi gera það líka.

Í fyrsta leiknum sínum, eftir hið hræðilega banaslys Jota og bróður hans, þá vildi Jón Ingi Davíðsson, leikmaður 4. flokks Njarðvíkur, heiðra minningu Portúgalans.

Faðir Jóns Inga, Davíð Ingi Jóhannsson, segir frá framtaki sonar síns á samfélagsmiðlum.

Þar kemur fram að Jón Ingi hafi ætlað að spila í Jota treyjunni sinni undir Njarðvíkurtreyjunni en vandamálið var að fann hana ekki í tíma fyrir leikinn.

„En þar sem gamla Jota treyjan fannst ekki, hjálpaði Íris systir hans honum að græja gamlan innanundir bol með eftirfarandi skilaboðum. Hann var aðeins þrjár mínútur að skora fyrsta markið og rífa treyjuna upp yfir haus eins og sést á myndinni hér að neðan,“ skrifaði faðir hans Davíð Ingi á fésbókinni.

Írís Davíðsdóttir kom þarna sterk inn en á bolnum stóð: „RIP Diogo Jota.1996-2025. YNWA“. eða „Hvíldu í friði Diogo Jota. Fæddur 1996, dáinn 2025. Þú munt aldrei ganga einn.“

Jón Ingi var að spila með 4. fokki Njarðvíkur á móti Fjölni á gervigrasi Fjölnismanna og þeir grænu fögnuðu 5-1 sigri.

Jón Ingi fór á kostum og skoraði fjögur mörk í leiknum þar af eitt þeirra beint úr hornspyrnu.




Fleiri fréttir

Sjá meira


×