Landsliðsþjálfaranum létt og spenna í hópnum

Valur Páll Eiríksson skrifar 9. júlí 2025 17:38

Sigurbirni landsliðsþjálfara er létt að liðið sé klárt. Þær Glódís Rún og Jóhanna Margrét Sýn

Landsliðshópur Íslands fyrir heimsmeistaramót íslenska hestsins í Sviss var opinberaður með pompi og prakt í höfuðstöðvum Icelandair í Hafnarfirði síðdegis. Tæpur mánuður er í mót og spenna á meðal HM-fara.

Boðið var til veislu í Hafnarfirði í dag og var þar ellefu manna hópur Íslands fyrir komandi heimsmeistaramót opinberaður, sem og sjö manna hópur ungmenna auk varaknapa og kynbótahrossa.

Mótið fer fram í Birmenstorf í Sviss dagana 4. til 10. ágúst næstkomandi. Fjórir ríkjandi heimsmeistarar frá árinu 2023 eru í landsliðshópi Íslands; þau Elvar Þormarsson á Djáknari frá Selfossi, Glódís Rún Sigurðardóttir á Snillingi frá Íbishóli, Jóhanna Margrét Snorradóttir á Kormáki frá Kvistum og Sara Sigurbjörnsdóttir á Flugu frá Oddhóli.

Landsliðsþjálfaranum létt

Vísir náði tali af Sigurbirni Bárðarsyni, landsliðsþjálfara, sem segir erfitt að velja slíkan hóp.

„Það tekur helling á. Maður er að ýta hörku knöpum til hliðar og þarf að velja sjö manna kjarna úr gríðarlega stórum hópi af toppfólki. Þannig að þetta er vandasamt. Það tekur líka á að þurfa að hafna einhverjum og bera leiðinleg tíðindi. Þetta er ekki bara gaman, en að lokum er þetta gaman. Að sjálfsögðu,“ segir Sigurbjörn sem er létt.

„Þetta er mikill gleðidagur og mikill léttir. Núna er bara áfram gakk. Nú verður farið að þjálfa, leggjast yfir knapana, sjá hvar þeir geta bætt sig og gert betur. Hópurinn er fastmótaður og liðið orðið til,“ segir Sigurbjörn.

Klippa: Léttir að hafa valið hópinn

Þær Jóhanna Margrét Snorradóttir og Glódís Rún Sigurðardóttir eru klárar í slaginn og mæta báðar til leiks sem ríkjandi meistarar frá mótinu 2023.

„Það er mikil spenna og eftirvænting. Núna þarf að passa að stilla þjálfuninni rétt fyrir mót. Ég er mjög spennt að mæta aftur,“ segir Glódís Rún sem er ný í A-landsliðshópnum eftir að hafa unnið til heimsmeistaratitils í fimmgangi í ungmennaflokki á síðasta móti.

„Þetta er búin að vera svolítil keyrsla á okkur í vor. Þetta hafa verið mörg mót og fólk að keyra sig upp. Eftir það þurfti maður aðeins að hvíla. Þannig að núna er maður svolítið að dunda sér í gang og svo upp úr næstu viku fer maður að keyra sig í gír aftur,“ segir Jóhanna Margrét aðspurð um hvernig eigi að stilla þjálfunina rétt. Jóhanna mætir á komandi mót sem ríkjandi heimsmeistari í tölti sem og samanlögðum fjórgangsgreinum.

Landsliðshópa Íslands má sjá að neðan.

Landsliðshópur Íslands fyrir HM íslenska hestsins í Sviss:

Fullorðnir

Elvar Þormarsson Djáknar frá Selfossi Fimmgangur F1 (ríkjandi heimsmeistari í gæðingaskeiði og 250 m. skeiði)
Glódís Rún Sigurðardóttir Snillingur frá Íbishóli Fimmgangur F1 (ríkjandi heimsmeistari í fimmgangi ungmennaflokki)
Jóhanna Margrét Snorradóttir Kormákur frá Kvistum Tölt T1 og fjórgangur V1 (ríkjandi heimsmeistari í tölti og samanlögðum fjórgangsgreinum)
Sara Sigurbjörnsdóttir Fluga frá Oddhóli Tölt T1 og fjórgangur V1 (ríkjandi heimsmeistari í fimmgangi)
Árni Björn Pálsson Kastanía frá Kvistum Tölt T1
Daníel Gunnarsson Kló frá Einhamri 250 m. og 100 m. skeið
Hans Þór Hilmarsson Ölur frá Reykjavöllum Fimmgangur F1, tölt T1 og gæðingaskeið PP1
Helga Una Björnsdóttir Ósk frá Stað Slaktaumatölt T2 og fjórgangur V1
Hinrik Bragason Trú frá Árbakka Gæðingaskeið PP1
Sigursteinn Sumarliðason Krókus frá Dalbæ 250 m. og 100 m. skeið

Ungmenni

Herdís Björg Jóhannsdóttir Hestur ekki ákveðið (ríkjandi heimsmeistari ítölti)
Jón Ársæll Bergmann Harpa frá Höskuldsstöðum Fimmgangur F1 (ríkjandi heimsmeistari í fjórgangi og samanlögðum fjórgangsgreinum)
Kristján Árni Birgisson Krafla frá Syðri-Rauðalæk 250m. og 100 m. skeið
Lilja Rún Sigurjónsdóttir Arion frá Miklholti Slaktaumatölt T2
Matthías Sigurðsson Magnea frá Staðartungu Gæðingaskeið og 250 m. skeið
Védís Huld Sigurðardóttir Ísak frá Þjórsárbakka Fjórgangur V1 og tölt T1
Þórgunnur Þórarinsdóttir Djarfur frá Flatatungu Fimmgangur F1, tölt T1 og gæðingaskeið PP1