„Eftir þetta hvass­viðri í þinginu í gær heldur lífið á­fram“

„Þetta er óvanaleg staða sem er uppi núna,“ segir Bergþór. Það sé alvanalegt að það hvessi við þinglok og stemningin súrni en þetta sé orðið langt tímabil núna.

„Í gær var staðan kannski súrari en alla jafna verður,“ segir hann.

Hann segir það þeirra verkefni að ljúka þinginu og það gæti alveg eins gerst í dag og það gæti gerst aðra daga.

Ragnar Þór er að upplifa sín fyrstu þinglok og segir þetta búið að vera lærdómsríkan tíma. Það sé heiður að sitja á þingi. Hann segist vakna bjartsýnn alla daga og hafi lært það í sínu fyrri starfi sem formaður VR í kjarasamningum að vera rólegur, sama hvað gengur á.

„Maður getur alltaf tekið eitthvað úr reynslubankanum. Sérstaklega núna undanfarið þar sem við Beggi höfum setið næturlangt, dögum saman, allar helgar, síðustu vikur.“

„Við sjáumst mun meira en við og konurnar okkar þessar vikurnar,“ segir Bergþór.

Ragnar segir alla þingflokksformenn hafa verið einbeitta og viljuga um að ná lausn.

Forsætisráðherra ávarpaði þing óvænt við upphaf þingfundar í gær og sagði vegið að lýðræðinu. Eftir það var mikill hiti á þingi hjá þingmönnum í minni- og meirihluta. Talað var um valdarán og ýmis ummæli þingmanna fordæmd.

Margt standist ekki skoðun sem var sagt í gær

Bergþór segir stöðuna í gær bera meiri vott um spennustöðina í húsinu en nokkuð annað.

„Mörg af þeim orðum sem voru látin falla standast kannski enga skoðun þegar menn draga aðeins andann,“ segir hann og tekur dæmi um „valdarán“ og að því hafi verið flaggað í tengslum við „ósköp venjulegar“ dagskrártillögur frá minnihluta sem hafi verið felldar en svo orðið að dagskrá þingsins degi síðar.

„Þannig það er nú ekki meira valdarán en það. Valdarán er eitthvað sem er undirorpið dauðarefsingu mjög víða í kringum okkur þannig menn verða aðeins að sprauta sig niður í orðavalinu.“

Ragnar Þór segir að miðað við það sem hann hafi kynnt sér um þinglok sé sú sérstaða núna að viðræðurnar núna séu meiri stjórnarmyndunarviðræður en að koma málum á dagskrá. Hverju sé hleypt í gegn og hvernig. Það sé mjög óhefðbundin nálgun.

Margt sé ósagt um ákvörðun Hildar

Ragnar Þór segir ljóst og liggja fyrir að Hildur Sverrisdóttir hafi sem varaforseti þingsins tekið valdið í sínar hendur í fyrradag þegar hún sleit þingi án samráðs við forseta þingsins. Það sé unnið eftir ákveðnu verklagi og að því hafi ekki verið fylgt.

Skiptar skoðanir eru á þessari ákvörðun Hildar og bendir Logi Bergmann, þáttastjórnandi Bítisins, á að Össur Skarphéðinsson, fyrrverandi ráðherra Samfylkingar, hafi tekið undir með minnihluta að þetta væri eðlilegt við þessar aðstæður.

Ragnar Þór segir að við eðlilegar aðstæður séu ritarar og starfsmenn hafðir með í ráðum og það sé margt við þessa sögu sem sé ósagt. Það verði ekki farið yfir það í þessum þætti.

Bergþór segir málþóf sitt eina vopn til að draga stjórnarmeirihluta að samningaborðinu. Í löndum í kring hafi stjórnarminnihluti fleiri úrræði og mögulega sé þörf á að endurskoða lögin þannig fleiri tól séu til málamiðlunar.

Hann segir umræðuna um veiðigjaldið þó að einhverju leyti hafa magnast upp því frumvarpið hafi komið fram seint á kjörtímabilinu. Venjulega hefjist þing í september, nú hafi það hafist í febrúar og frumvarpið verið lagt fram í mars. Ríkisstjórnin hafi ætlað sér of mikið á stuttu þingi og þess vegna lendi þingið „í risaskafli“ núna. Enn séu mörg mál órædd.

Spurður hvort ekki sé eðlilegt að málið fari í atkvæðagreiðslu þegar meirihluti þjóðar styður málið samkvæmt skoðanakönnunum segir Bergþór þar hlutverk stjórnarandstöðu að vera með aðhald þegar vond lagasetning er lögð fram.

Skýrt að málinu verði lokið

Ragnar Þór segir ríkisstjórnina alveg skýra með það að þetta mál verði klárað, að veiðigjaldið verði reiknað út frá markaðsvirði og ekki öðru, og að þjóðin fái réttlátan arð af þeirri auðlind sem ákveðin fyrirtæki hafa aðgang að. Hann segir andstöðuna ljósa en einnig stuðning þjóðarinnar.

„Við teljum þetta vera eitt af lykilmálum ríkisstjórnarinnar sem er ekki hægt að semja út af borðinu.“

Spurður hvort skynsamlegra hefði verið að bíða segir Ragnar að málið hafi verið rætt töluvert. Það hafi verið slegin met í bæði fyrstu og annarri umferð og málið hafi fengið eina lengstu þinglegu meðferð. Þó þingið sé stutt sé þingleg meðferð með allra lengsta móti. Málið hafi tekið breytingum í meðferð nefndar og það að fresta fram á haust myndi ekki skipa miklu máli.

Bergþór segir minnihluta bæði hafa lagt fram breytingartillögur innan núverandi kerfis og tillögur að breytingum á frumvarpi ríkisstjórnarinnar. Það verði einhver leið fundin á endanum.

Hann segir alvanalegt að fresta málum á milli funda og í raun sé umræðan ekki orðin eins löng og hún geti orðið. Í umræðu um þriðja orkupakkann hafi níu þingmenn tekið þátt en nú séu þeir 27. Þingmennirnir margir eigi því mikið inni í umræðum og hann sjálfur hafi aðeins sagt um þriðjung af því sem hann hafi að segja um málið.

„Í þessu felst engin hótun,“ segir Bergþór.

Bergþór segir að málinu verði lokið að enda. Þingfundur hefst í dag klukkan tíu í dag og er veiðigjaldafrumvarpið eina málið á dagskrá.

Alltaf markmiðið að semja

Ragnar segir sína nálgun að það sé alltaf hægt að semja. Það sé hans markmið að ná niðurstöðu um þinglok og hann taki því verkefni alvarlega. Bergþór tekur undir það. Þinginu muni ljúka. Málinu verði annað hvort frestað á milli þinga eða það leitt í atkvæðagreiðslu.

Bergþór segir valkostina ekkert marga en þeir séu tiltölulega skýrir. Báðir segja þeir að þeim líði eins og minni vilji sé til að semja en þeir vonuðust eftir en þetta muni þó taka enda að lokum.

„Eftir þetta hvassviðri í þinginu í gær heldur lífið áfram og við finnum út úr þeim verkefnum sem fyrir okkur liggja.“