Hulk Hogan er látinn

Dægurmiðillinn TMZ greinir frá andláti Hogan. 

Þar kemur fram að sjúkraliðar hafi verið kallaðir á vettvang heimilis Hogan í Clearwater í Flórída í morgun eftir að hann fékk hjartaáfall. Það virðist hafa dregið hann til dauða en að svo stöddu liggja ekki frekari upplýsingar um andlát hans.

Sögusagnir um versnandi heilsu Hogan höfðu gengið síðustu vikur og neitaði eiginkona hans, Sky, því að hann væri fallinn í dá eftir hjartaaðgerð.

Gjörbreytti fjölbragðaglímu

Terry Gene Bollea fæddist 11. ágúst 1953 í Augusta í Georgíu, sonur byggingarverktakans Pietro „Peter“ Bollea og danskennarans Ruth V. Bollea. Eftir að hafa starfað sem tónlistarmaður fór Terry út í fjölbragðaglímu 1977 og tók þá upp glímunafnið Hulk Hogan.

Hogan öðlaðist heimsfrægð þegar hann skrifaði undir hjá WWF (sem síðar varð WWE) í desember 1983 og átti þátt í að leiða glímusprengjuna sem varð í Bandaríkjunum á níunda áratugnum. Hogan var aðalnúmer stærsta viðburðar WWF, Wrestlemania, átta sinnum fyrstu níu árin.

Þá varð hann fimm sinnum WWF-meistari og hélt meistarabeltinu í 1.474 daga, met sem stendur enn. Glíma Hulk Hogan við André the Giant þann 5. febrúar 1988 á enn áhorfsmet í bandarísku sjónvarpi en 33 milljón manns horfðu á hana. Glíma hans við Dwayne „Steina“ Johnson árið 2002 er einnig einn frægasti bardagi í sögu WWE.

Hogan fór einnig út í kvikmyndaleik og lék í myndunum Rocky III (1982), No Holds Barred (1989), Suburban Commando (1991) og Mr. Nanny (1993).

Glímuferill Hogan dalaði eftir að hann hætti árið 1993 en hann sneri fljótt aftur og fór í gegnum endurnýjun lífdaga 1996 þegar hann breytti sér í glímuillmennið „Hollywood“ Hulk Hogan og leiddi glímuhópinn New World Order. 

Rasísk ummæli, kynlífsmyndband og stuðningur við Trump

Hulk Hogan var gerður að meðlimi í heiðurshöll WWE árið 2005. Hann var hins vegar fjarlægður úr höllinni árið 2015 eftir að klippa úr falinni myndavél frá 2007 kom fyrir almannasjónir þar sem Hogan notaði ítrekað n-orðið í niðrandi tilgangi.

Hogan lögsótti miðilinn Gawker sem birti myndbandið, hafði betur fyrir dómstólum og fékk 14 milljarða í skaðabætur.

Hulk fékk síðan aftur inngöngu inn í frægðarhöllina árið 2020 en þá sem hluti af glímuhópnum New World Order. 

Seinni ár ferilsins fór Hogan út í raunveruleikasjónvarp og pólitík en hann lýsti yfir stuðningi við Donald Trump og kom fram á Landsfundi Repúblikana til að flytja þar erindi.

Hogan var þrígiftur. Fyrsta hjónaband hans var með Lindu Claridge árin 1983 til 2009 en átti börnin Nick og Brooke með henni. Ári eftir skilnaðinn giftist hann Jennifer McDaniel og voru þau saman í ellefu ár en skildu árið 2021. Hann giftist svo þriðju eiginkonu sinni, Sky Daily, árið 2023.

Fréttin hefur verið uppfærð.