Svakalegir ráshópar á fyrsta degi á Ís­lands­mótinu í golfi

Íslandsmótið í golfi 2025 fer fram á Hvaleyrarvelli hjá Golfklúbbnum Keili og hefst á morgun.

Mikil spenna er fyrir mótinu, en þangað mæta bestu kylfingar landsins og leika um Íslandsmeistaratitilinn.

Rástímar fyrstu tveggja keppnisdaganna hafa verið birtir, en eftir það verður raðað eftir skori.

Fyrsti ráshópur mótsins hefur leik klukkan sjö í fyrramálið. Þar eru Henning Darri Þórðarson úr GK, Sverrir Haraldsson úr GM, og Björn Viktor Viktorsson úr GR. Ræst er með ellefu mínútna millibili og hefur síðasta holl leik kl. 15:37.

Það er boðið upp á svakalega ráshópa hjá báðum kynjum á fyrsta degi.

Forgjafarlægsta holl karlaflokksins hefur leik klukkan 09:23 á morgun. Þar eru Aron Snær Júlíusson, ríkjandi Íslandsmeistari, Tómas Eiríksson Hjaltested, efsti maður stigalistans, og Axel Bóasson, þrefaldur Íslandsmeistari.

Forgjafarlægsta holl kvennaflokksins er ræst út næst á eftir karlahollinu. Í því leika Guðrún Brá Björgvinsdóttir, þrefaldur Íslandsmeistari, Heiðrún Anna Hlynsdóttir, sem er efst á stigalistanum, og Hulda Clara Gestsdóttir, ríkjandi Íslandsmeistari.

Það má finna alla rástímana með því að smella hér.

Hér fyrir neðan má sjá kynningu á helstu keppendum frá heimasíðu Golfsambands Íslands.

Í kvennaflokki er meðalforgjöfin 0.84, sem er lægsta meðalforgjöfin í ár. Lægsta forgjöf flokksins er +5.4, sem er forgjöf Ragnhildar Kristinsdóttur. Hún hefur enn ekki leikið á GSÍ mótaröðinni í sumar, en hefur náð frábærum árangri á LET Access mótaröðinni. Hún varð í júlí fyrsti íslenski kylfingurinn til að vinna á mótaröðinni, og situr í fimmta sæti stigalistans. Ragnhildur varð Íslandsmeistari í fyrsta skiptið árið 2023, en hún hefur þrisvar hafnað í öðru sæti mótsins.

Ríkjandi Íslandsmeistari kvenna, Hulda Clara Gestsdóttir, er einnig á meðal keppenda. Þetta er fyrsta mót Huldu á GSÍ mótaröðinni í sumar, en hún leikur í háskólagolfinu í Bandaríkjunum með University of Denver. Hulda hefur unnið mótið tvisvar, á Hólmsvelli árið 2024 og á Jaðarsvelli árið 2021.

Guðrún Brá Björgvinsdóttir tekur einnig þátt í mótinu. Guðrún hefur leikið á LET og LET Access mótaröðunum í sumar, en LET mótaröðin er stærsta svið atvinnukylfinga í Evrópu. Guðrún vann Íslandsmótið þrjú ár í röð á tímabilinu 2018-2020, og hefur náð þeim ótrúlega árangri að vera átta sinnum í efstu þremur sætum mótsins.

Heiðrún Anna Hlynsdóttir kemur inn í mótið sem efsti kylfingur stigalistans. Hún hefur unnið öll þau fjögur mót sem hún hefur tekið þátt í í sumar, og stefnir að sínum fyrsta Íslandsmeistaratitli á Hvaleyrarvelli í ár. Heiðrún hefur leikið frábært golf í allt sumar og hefur tryggt sér stigameistaratitil kvenna áður en Íslandsmótið fer fram.

Á vellinum má einnig finna fleiri frábæra kylfinga, þ.á.m. fyrrverandi Íslandsmeistarana Perlu Sól Sigurbrandsdóttur, Þórdísi Geirsdóttur og Ragnhildi Sigurðardóttur.

Í karlaflokki er meðalforgjöfin +2.03, sem er sú lægsta á tímabilinu. 72 kylfingar eru með forgjöf undir 0, en þar á meðal eru margir fyrrverandi Íslandsmeistarar.

Tómas Eiríksson Hjaltested er með lægstu forgjöf mótsins, +5.7. Tómas er efsti kylfingur stigalistans og hefur leikið frábærlega á GSÍ mótaröðinni í sumar. Hann hefur verið í efstu fimm sætunum í öllum mótum sumarsins, og þrisvar endað í öðru sæti. Hann hefur þó enn ekki unnið á tímabilinu og stefnir að sigri í því elsta og virtasta. Tómas sigraði í Hvaleyrarbikarnum á síðasta ári, og hefur því góða reynslu af vellinum.

Dagbjartur Sigurbrandsson kemur þar á eftir, með forgjöfina +5.6. Dagbjartur lauk háskólanámi sínu í Bandaríkjunum fyrr í sumar og hefur einungis keppt á einu móti hérlendis. Þar lék hann í Korpubikarnum, þar sem hann hafnaði í 3. sæti eftir frábæra spilamennsku.

Atvinnukylfingarnir Guðmundur Ágúst Kristjánsson og Haraldur Franklín Magnús eru báðir á meðal keppenda í mótinu. Báðir leika þeir á HotelPlanner Tour mótaröðinni í Evrópu, sem er sú næststerkasta á eftir Evrópumótaröðinni. Guðmundur og Haraldur hafa báðir orðið Íslandsmeistarar, Haraldur árið 2012 á Strandarvelli og Guðmundur árið 2019 á Grafarholtsvelli.

Heimamenn í Golfklúbbnum Keili hafa reynst sigursælir í karlaflokki. Axel Bóasson hefur unnið mótið þrisvar, meðal annars þegar mótið var haldið á vellinum síðast árið 2017. Hann stefnir að sínum fjórða sigri í ár.

Margir fyrrverandi Íslandsmeistarar verða á svæðinu, þ.á.m. Aron Snær Júlíusson, ríkjandi Íslandsmeistari, og Logi Sigurðsson, meistari 2023.

Keppendur mótsins koma úr 17 golfklúbbum víðs vegar af landinu. Golfklúbbur Reykjavíkur á flesta keppendur, alls 32, en heimamenn í Golfklúbbnum Keili eiga 21 kylfing í mótinu.