„Við fórum hina erfiðari leiðina og hún var eigin­lega bara sætari ef eitt­hvað er“

„Ég var að reyna lýsa þessu eitthvað áðan og notaði bara einhver orð. Þakklæti, æðruleysi og ég bara elska þetta félag og elska þetta fólk“ sagði Sindri Kristinn Ólafsson meyr eftir leik í dag.  

Keflavík tryggði sér sæti í Bestu deildinni með sigri í dag en þetta er þó ekki í fyrsta sinn sem Sindri Kristinn Ólafsson fer upp með Keflavík.

„Ég er nátturlega ekki 19 ára lengur, ég er búin að fara upp tvisvar áður en þetta er ekkert eðlilega skemmtilegt fyrirkomulag“

„Að þurfa að þjást í gegnum þetta umspil, komast inn í það og vinna það svo hérna. Þetta er svo geðveikt fyrir þann sem vinnur þannig ég er mjög hrifinn af þessu“

Keflavík var síðasta liðið til þess að tryggja sig inn í umspilið en enduðu þó uppi sem sigurvegarar. 

„Það er lýgilegt hvernig við troðum okkur inn í umspilið. Við vorum með bakið alveg upp við vegg og byssuna við ennið og stóðum okkur. Eftir það þá finnst mér við búnir að spila okkar langbesta fótbolta“

„Mér finnst við varla búnir að vera lélegir á þessum tíma síðan við unnum Njarðvík á Ljósanótt. Þetta er nátturlega fáránlegur viðsnúningur og maður mun muna lengi eftir þessu tímabili“

Sindri Kristinn gekk til liðs við Keflavík fyrir mót aftur frá FH og var þetta alltaf takmarkið. 

„Já ég held að ég hafi sagt í einhverju viðtali við Sýn að við ætluðum okkur að vinna deildina en það tókst ekki alveg. Við fórum hina erfiðari leiðina og hún var eiginlega bara sætari ef eitthvað er“

Það var mikill spenningur fyrir leiknum í dag og Sindri Kristinn gat varla beðið eftir því að komast á völlinn.

„Það var ógeðslega mikill spenningur. Við áttum að mæta þarna hálf tvö upp í klefa en mig langaði að fara bara upp í klefa hálf ellefu. Ég hef sjaldan verið svona spenntur fyrir leik og hanga fannst mér allan daginn þó svo að leikurinn væri klukkan fjögur“

„Ég vissi að við ættum alveg séns í þetta en að vera 3-0 yfir í hálfleik sá ég ekki fyrir“