Fyrir­liði Banda­ríkjanna ver gjammandi stuðnings­mennina

Bandarískir áhorfendur gerðu hróp að leikmönnum evrópska liðsins á öðrum keppnisdegi mótsins. Rory McIlroy svaraði þeim fullum hálsi og sagði þeim að halda kjafti.

„Mér fannst stuðningsmennirnir bara vera ástríðufullir,“ sagði Bradley en hans menn eru í afar erfiðri stöðu fyrir þriðja og síðasta keppnisdaginn, enda 11 1/2-4 1/2 undir.

„Liðið þeirra er að tapa illa. Þetta eru ástríðufullir stuðningsmenn. Ég var ekki í Róm en ég heyrði sögur að það hefði verið frekar slæmt,“ sagði Bradley og vísaði til Ryder-bikarsins fyrir tveimur árum þar sem Evrópa hafði betur.

„Stuðningsmennirnir í New York hafa, miðað við það sem ég hef séð, verið nokkuð góðir. Það eru alltaf einhverjir sem fara yfir strikið og það er miður. Ég sá leikmennina mína reyna að róa suma sem voru þannig.“

Evrópska liðið þarf aðeins þrjá vinninga í viðbót til að vinna Ryder-bikarinn annað skiptið í röð.

Keppni á lokadegi Ryder-bikarsins hefst klukkan 16:00. Sýnt verður beint frá mótinu á Sýn Sport 4.