Fallið frá kröfum um neyðarfjarskipti á há­lendinu

Félagið Öryggisfjarskipti sem tengist Neyðarlínunni og er að mestu í opinberri eigu fékk úthlutað tíðniheimildum frá Fjarskiptastofu í tengslum við uppbyggingu neyðar- og öryggiskerfis og þátttöku í uppbyggingu nýrra sendastaða við stofnvegi. Uppbyggingin er í samstarfi við fjarskiptafyrirtækin sem þurfa að setja upp sendastöðvar.

Ætlunin var að loka gloppum í fjarskiptasambandi á stofnvegum um landið og leysa svonefnt tetra-kerfi af hólmi með nýjum sendum. Meðal annars stóð til að fjarskiptasamband næðist á öllum stofnvegum og á hálendisvegum. 

Ríkið hefur hins vegar ekki tryggt Öryggisfjarskiptum fjármagn til þess að standa við þau skilyrði um útbreiðslu sem Fjarskiptastofa setti fyrir því að veita tíðniheimildina. 

Skilyrðin voru endurskoðuð í samráði stofunnar við fjarskiptafyrirtækin og Öryggisfjarskipti í vor. Þá var ætlunin að fella út kröfu um uppbyggingu á Sprengisandsleið en halda öðrum hálendisleiðum inni og seinka uppbyggingu við stofnvegi um tvö ár, að því er kom fram í frétt Ríkisútvarpsins í maí.

Ívilnanir til að auka ekki kostnað fjarskiptafyrirtækjanna

Eftir frekara samráð sem var haldið þegar ljóst varð að ekki væri von á að uppbyggingin yrði fjármögnuð á næstunni er niðurstaðan að fella niður kvaðir um uppbyggingu á öllum hálendisvegum. Útbreiðsluskylda fjarskiptafyrirtækjanna á stofnvegum verði 99 prósent í árslok 2027 og hundrað prósent í lok árs 2028. Þá verði því frestað að auka hraða í netsambandi um fimm ár, að því er segir í tilkynningu frá Fjarskiptastofu.

Þar segir að ívilnanirnar eigi að gera Nova, Símanum og Sýn kleift að klára útbreiðslu við stofnvegi án þess að kostnaður verði meiri en áætlaður var á hvert fyrirtæki í upphafi.

Öryggisfjarskipti eiga að halda áfram að skipuleggja uppbygginguna án endurgjalds og án þess að vera hluti af fjárfestingum. Félagið heldur tíðniheimid sinni en hún verður tekin til endurskoðunar árið 2030 ef áform um uppbyggingu liggja ekki fyrir þá.

Fjarskiptafyrirtækin og Öryggisfjarskipti hafa nú skilyrðin til umsagnar. Öryggisfjarskipti eiga að auglýsa aðgang að tíðninni og skilmála aðgangsins fyrir áramót.

Vísir er í eigu Sýnar.