Stein­hissa á MR og rifjar lúmskt upp sjón­varps­leysið á fimmtu­dögum

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Klukkan hringir 6:50 en ég er dyggur aðdáandi snooze takkans. Oftast er eiginkonan að koma inn eftir morgungönguna með hundinn þegar ég skríð loks framúr. 

Flesta morgna keyri ég einn unglinginn í menntaskóla á leið til vinnu. Nú seinkaði MR upphafi skóladags og það án þess að spyrja mig álits!“

Hvað er það fyrsta sem þú gerir á morgnana?

„Tek úr uppþvottavélinni, en á meðan kaffið hellist uppá skoða ég dagbókina mína í símanum, les því næst Moggann og/eða Heimildina, fer loks yfir daginn með eiginkonunni og börnunum. 

Við erum með fjóra unglinga eða ungt fólk í heimili og helsta markmiðið með morgunsamráðinu er að áætla fjöldann í kvöldmat. Sú áætlun stenst orðið sjaldnar en áður.“

Hver var skemmtilegasti útileikurinn þegar þú varst lítill?

Fallin spýta og kýló! Ég ólst upp í efri bænum á Ísafirði. 

Hverfið var fullt af börnum og mikið líf á götum þess fram eftir kvöldi, sér í lagi á Hlíðarveginum. 

Fimmtudagskvöldin voru fjölmennust og best út af sotlu!

Ég og tveir æskuvinir mínir vorum dúfnabændur þar til við lentum í stórbruna. Ég man enn tölurnar úr tjóninu; 23 dúfur og 10 egg brunnu inni. Vinur minn náði að bjarga einni úr eldhafinu en við þá aðgerð sviðnuðu augnhár hans. 

Eftir brunann snerum við okkur alfarið að útgerð árabáts sem við smíðuðum sjálfir, þar til bátnum hvolfdi og mæður okkar stöðvuðu frekari framþróun þeirrar útgerðar.

Næsta uppátæki var uppbygging golfvallar í hlíðum Eyrarfjalls, en kylfurnar voru til að byrja með heimasmíðaðar úr aflögðum bílaþvottakústum frá bensínstöðinni. 

Eldri bróðir minn hafði einhvern tímann keypt eina golfkylfu, sexu, og um 11 ára aldur tókst mér að eigna mér hana. Þetta var upphafið á golfáhuganum sem svo færðist í vöxt. Golf er tímafrekt áhugamál og ég hef ekki gefið því tíma síðan á unglingsárum, en bíð eftir rólegri tíma!“

Í hvaða verkefni ertu að vinna helst í þessa dagana?

„Gerð fjárhagsáætlunar er ávallt verkefni þessa tíma árs. Í vikunni skrifuðum við jafnframt undir samning við Múlakaffi um vetrarrekstur nýrrar farþegamiðstöðvar okkar við Viðeyjarsund. Við gerum okkur vonir um að þessi glæsilega bygging verði eitt af stóru viðburðarrýmum borgarinnar á komandi árum.

Innleiðing stefnu og stefnumarkmiða sem stjórnin okkar samþykkti s.l. vetur tekur einnig tíma þessi misserin og mikið er að gerast hjá okkur á hafnarsvæði Grundartanga en fjögur fyrirtæki sem eru að þróa stórverkefni eiga í viðræðum við okkur um lóðir og hafnaraðstöðu.

Vegagerðin hefur boðað kynningu á niðurstöðum umhverfismats þriggja kosta við lagningu Sundabrautar. Við erum viðbúin því að tveir þeirra hafi mikil áhrif á skipulag og starfsemi Sundahafnar - hryggjastykkisins í rekstri Faxaflóahafna - og við höfum verið að undirbúa okkur undir viðræður um þessar mismunandi útfærslur.

Að lokum má geta þess að mjög skyndilegar og margþáttar breytingar á skattaumhverfi skemmtiferðaskipa virðast ætla að baka okkur nokkurt tjón. Töluverður tími hefur farið í það að undanförnu að skilja áhrif þeirra breytinga og ræða við stjórnvöld um leiðir sem við teljum skynsamlegri.“

Hvernig skipuleggur þú þig í vinnu?

„Þessi spurning kemur á viðkvæmum tíma. Ég hef verið supernotandi OneNote og Outlook. Nú hef ég sannfærst að sumt sem ég geri þar ætti betur heima í nýrri og skilvirkari lausnum sem við höfum innleitt, svo sem Asana. 

Mér gengur hins vegar ekkert alltof vel að tileinka mér þær breytingar og ég skil sífellt betur orðatiltækið að erfitt sé að kenna gömlum hundi að sitja. 

Samstarfsfólk mitt af yngri kynslóðinni skilur ekki hvers vegna ég er svona lengi að þessu, en ég hef lofað bót og betrun.“

Hvenær ferðu að sofa á kvöldin? 

„Þegar frágangi er lokið í eldhúsinu eftir kvöldmat sest ég við tölvuna. Það er oft besti tíminn, engin truflun og auðvelt að sökkva sér betur í flóknari mál. 

Ég á það til að drolla fram eftir, stundum fram yfir miðnætti, en er að reyna að hætta því. Ég reyni þó að gæta þess að bögga samstarfsfólk mitt ekki að óþörfu á þessum tíma og nota óspart fídusana í Outlook og Teams sem gera manni kleift aðsenda skilaboðin ekki fyrr en við upphaf næsta vinnudags.“