Stærsti felli­bylur í sögu Jamaíka

Fellibylurinn, sem var í styrkleikaflokki fimm, náði landi á suðvesturhluta Jamaíku og fór þvert yfir eyjuna. Að minnsta kosti sjö eru taldir látnir vegna fellibylsins, þrír á Jamaíku, tveir í Haítí og einn í Dóminíska lýðveldinu. 

Að minnsta kosti þrjár fjölskyldur eru fastar á heimilum sínum og ekki er hægt að bjarga þeim þaðan vegna veðursins. Fjögur sjúkrahús urðu fyrir skemmdum, þar af er einn þeirra án rafmagns og þurfti að flytja 75 sjúklinga á annað sjúkrahús. Þá þurftu um fimmtán þúsund manns að leita í neyðarskýli til að skýla sér fyrir Melissu.

Þegar Melissa náði til eyjunnar var vindhraðinn 295 kílómetrar á klukkustund, eða rúmir áttatíu metrar á sekúndu, en búist var við hviðum upp á 321 kílómetra á klukkustund, 89 m/s, fyrir miðju bylsins. Það hægðist aðeins á þegar hann fór yfir landið, eða niður í 270 kílómetra á klukkustund. Varað var við snörpum vindi, skyndiflóðum og sjávarflóði í kjölfar fellibylsins og íbúar hvattir til að halda sig innandyra.

Að minnsta kosti þriðjungur íbúa Jamaíku var án rafmagns og flæddi yfir vegi eyjunnar. Íbúi á eyjunni sagði í samtali við breska ríkisútvarpið að fjöldi þaka hefðu fokið af byggingum. 

Miðjan náði yfir eyjuna rúmlega hálf tíu á íslenskum tíma en stefna hans er nú á Kúbu. Þrátt fyrir það er enn afar hvasst og mikill vindur á eyjunni. Gert er ráð fyrir að Melissa nái landi á Kúbu á miðvikudagsmorgun en fjöldi fólks hefur yfirgefið heimili sín vegna þess.