Frétti af Schumacher og fékk sjokk: „Átti að fara njóta lífsins“

Hakkinen, sem varð á sínum tíma í tvígang heimsmeistari í Formúlu 1, háði harða baráttu við sjöfalda heimsmeistarann Michael Schumacher innan brautar. Rígurinn á milli þeirra var mikill en virðingin þó alltaf til staðar, Hakkinen ók fyrir McLaren en Schumacher fyrir Ferrari. 

Michael Schumacher hefur ekki sést á almannafæri síðan að hann slasaðist illa á höfði í skíðaslysi í Ölpunum fyrir tólf árum síðan. Fjölskyldan passar vel upp á að ástand hans sé einkamál hennar.

Hakkinen var á dögunum gestur í hlaðvarpinu The High Performance podcast, þar sem að hann var spurður út í Schumacher. 

„Ég man vel eftir þessum degi,“ segir Hakkinen um daginn örlagaríka er Schumacher slasaðist en árið áður hafði hann sagt skilið við Formúlu 1 og ökumannsferil sinn. 

„Ég bara trúði þessu ekki. Öll þessi erfiðsvinna sem hann hafði lagt á sig, allur þessi árangur sem hann náði. Þarna átti hann að fara njóta lífsins, gera það sem að honum langaði til að gera.“

Hakkinen sjálfur hefur reynslu af höfuðmeiðslum en tímabilið 1995 lenti hann sjálfur í alvarlegu atviki í ástralska kappakstrinum og hlaut þungt höfuðhögg

„Þegar að ég frétti af þessu þá fékk ég auðvitað sjokk. Svo þegar að ég heyrði að hann hefði hlotið höfuðmeiðsli, hafandi sjálfur orðið fyrir höfuðmeiðslum sem Formúlu 1 ökumaður árið 1995, þá leist mér ekki á blikuna.“

Allt saman við þetta sé sorglegt.

„Hugur manns var strax hjá fjölskyldu hans. Það var svo mikið sem var framundan fyrir hann. Maður getur í raun skipt lífinu upp í nokkra kafla. Fyrst ertu ungur og að klára þinn námsferil, hjá okkur tók svo við ferill sem ökuþórar í mótorsporti og eftir þann feril átti hið raunverulega líf að hefjast fyrir alvöru. En um leið og Michael er að fara hefja þann kafla gerist þetta. Þetta er ekki sanngjarnt.“

Viðtalið við Mika Hakkinen má sjá hér fyrir neðan: