Stöðva af­greiðslu um­sókna inn­flytj­enda frá ní­tján ríkjum

Um er að ræða sömu nítján ríkin og stjórnvöld hafa lagt á ferðabann en þeirra á meðal eru Venesúela, Kúba, Súdan, Libía, Íran, Jemen, Afganistan og Sómalía.

„Trump-stjórnin er að grípa til allra aðgerða til að tryggja að þeir einstaklingar sem fá ríkisborgararétt séu þeir bestu af þeim bestu,“ hefur New York Times eftir Matthew Tragesser, talsmanni útlendingayfirvalda. Það væru forréttindi, ekki réttur, að fá ríkisborgararétt í Bandaríkjunum.

Hertar aðgerðir stjórnvalda eru taldar munu hafa áhrif á hundruð þúsunda umsókna um dvalarleyfi og ríkisborgararétt. Lögmenn segja skjólstæðinga sína hafa orðið fyrir því að skipulögðum viðtalstímum hafi verið frestað og einnig athöfnum þar sem einstaklingar verða formlega að ríkisborgurum.

Yfirvöld segjast hafa í hyggju að fara aftur yfir umsóknir umræddra einstaklinga og jafnvel láta þá endurtaka allt ferlið. Óttast er að þetta muni hafa þau áhrif að biðtími þeirra lengist um mánuði og jafnvel ár. Dómskerfið á nú þegar í erfiðleikum með að höndla öll þau útlendingamál sem bíða úrlausnar.