Fram­kvæmda­stjóri Bónus: „Ég er svona „aulahúmor“-stríðinn“

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég er yfirleitt vaknaður um 06:45, en prógrammið byrjar raunverulega rétt fyrir sjö þegar krakkarnir vakna — við eigum eina 3 ára stelpu og einn 7 ára strák og þau taka morgunprógramið með stormi.

Rólegir, kósý morgnar eru pínu fjarlægur draumur í bili… en ég veit að það kemur seinna.“

Hvað er það fyrsta sem þú gerir á morgnana?

„Fyrsta verkefnið er smá koffín og að koma krökkunum af stað inn í daginn. Ég er nýlega kominn í góða rútínu þar sem ég næ að skella mér á æfingu um 7:30, þrjá daga vikunnar en þá sér betri helmingurinn um morgunferðina í skóla/leikskóla, þannig að þá næ ég að lauma æfingu inn.“

Á skalanum 0–10, hve stríðinn ertu?

„Ég myndi segja 7 — þó það sé best að fá „markhópinn“, börnin, til að staðfesta það.

Ég er svona „aulahúmor“-stríðinn, ekki „kvikindis“-stríðinn. Mér finnst grínið mitt oft spot on… en ég er ekki viss um að það sé alltaf jafn mikið að slá í gegn.

Það er mjög stutt í léttleika hjá mér, ég tek mig ekki of hátíðlega og býð stundum óþarflega mikið upp á að hafa gaman á minn kostnað.“

Í hvaða verkefni ertu helst að vinna þessa dagana?

„Núna er einn skemmtilegasti tíminn í verslunarrekstri — jólin!

Við í Bónus erum að þróast töluvert og eru því ótrúlega mörg spennandi verkefni í gangi öllum tíðum. En akkúrat núna er allur fókus á því að gera jólaverslunina eins góða og mögulegt er: besta verðið á jólamatnum og skemmtilega upplifun alveg fram að jólum.

Ódýrast vikunnar er í jólabúning og jóla tilboðin eru í fullri keyrslu en í ár verðum við með nýtt í Bónus í Kauptúni en þar ætlum við að hafa JólaBónus, þar sem við sköpum aukna jólastemningu í Bónus Kauptúni allar helgar fram að jólum — með jólasveinum, jólahúsi fyrir börnin, ristuðum möndlum, gosi, kakó og ýmsu góðgæti sem við bjóðum gestum upp á.Markmiðið er að skapa  notalega og minnisstæða jólaupplifun á meðan fólk verslar.“

Hvernig skipuleggur þú þig í vinnunni?

Góð spurning! Dagarnir eru mjög þéttir og oft mikið mótaðir af fundum og verkefnum dagsins. Samt sem áður elska ég að hugsa langt fram í tímann en ég ég er algjört stefnumótunarnörd.

Þó stefnumótunin sé skipulögð, skýr og verkefnastýrð þá viðurkenni ég að „auka“-verkefnin eru stundum með aðeins sveigjanlegra skipulag. 

Ég held ég hafi prófað flest skipulagstól sem til eru, og er núna að nota Notion… en í hreinskilni sagt er tekur oft skipulagt kaos yfir þegar mest er að gera, en þá hefur virkað vel fyrir mig að vera sveigjanlegur og yfirvegaður á sama tíma, hversu vel sem það hljómar.“

Hvenær ferðu að sofa á kvöldin?

„Ég reyni að sofna um 23:30 til að ná 7–8 klukkustundum. Það gerist samt alveg, og mögulega of oft — að ég tími ekki að fórna kvöldinu og sit aðeins lengur uppi til að fá smá „me-time“. En sem betur fer sef ég eins og steinn og tek tvær mínútur að sofna svo þetta hefur ekki haft of neikvæð áhrif hingað til.“