Fjöl­menni í Tene-afmæli Gurrýjar en enga Sól­rúnu Diego að sjá

Stelpurnar hafa síðan árið 2021 haldið úti hlaðvarpinu Spjallinu og gefið út á annað hundrað hlaðvarpsþátta. Þáttur númer 143 kom út 5. janúar síðastliðinn en þar ræddu stelpurnar um yfirvofandi afmælisfögnuð Gurrýjar og völvuspá fyrir árið.

„Við erum að byrja árið á einhverri veislu,“ sagði Lína Birgitta um afmælið.

„Ég er alltaf á Tenerife í janúar, það er svona hefð sem ég er með og alltaf yfir afmælið mitt. Ég ætlaði að hafa afmæli og hugsaði: „Ókei, það eru ótrúlega margir sem ég þekki á Tenerife þannig ég hendi í lítið, létt partý.“ Nei, nei, þetta er ekki lítið. Kristín Ruth, vinkona mín, sem er líka halda afmælið sitt á Tene, hún er fertug, sagði: „Mitt er bara eins og eitthvað vöffluboð við hliðina á þínu.“,“ sagði Gurrý í þættinum.

Lýsti Gurrý því að afmælið yrði garðpartý í anda sjónvarpsþáttanna White Lotus. Bæði hún og Lína lýstu því síðan hvernig kjólum þær ætluðu að klæðast.

„En þú, í hverju ætlar þú að vera? spurði Gurrý þá Sólrúnu og uppskar mikinn hlátur frá Línu.

„Ég veit það ekki, það verður bara að koma í ljós,“ svaraði Sólrún.

„Bara nakin?“ spurði Gurrý.

„Já,“ svaraði húm um hæl.

„Hún ætlar að vera á pjöllunni,“ sagði Lína þá glettin.

Mörg tónlistaratriði og tugir gesta

Fimm dögum síðar, 10. janúar, hélt Gurrý upp á 35 ára afmæli sitt í villunni Finca La Rosa de Los Vientos á Adeje á Tenerife. 

Villan er á Reykjavíkurgötu og hafa bæði Ásgeir Kolbeins og Svava Johansen leigt hana fyrir afmæli sitt á síðustu árum.

Gurrý hafði fengið tónlistarmennina Ingó Veðurguð, Hipsumhaps og Prettyboitjokkó til að troða upp í veislunni og tók sjálf lagið með dóttur sinni auk þess sem Egill Einarsson, maður hennar, þeytti skífum.

Tugir manna mættu í veisluna, þar á meðal áhrifavaldurinn Lína Birgitta og kírópraktorinn Gummi Kíró, kynlífstækjasölukonan Gerður í Blush, útvarpskonan Kristín Ruth, fjölmiðlamaðurinn Ásgeir Kolbeins og stjörnuspekingurinn Hera Gísladóttir og fjölmargir aðrir góðir. 

Aftur á móti var Sólrún Diego fjarri góðu gamni.

Á sama tíma og gestir birtu myndir úr partýinu daginn eftir djammið var Sólrún að þrífa bletti úr drapplitaðri úlpu, horfa á Kardashian-fjölskylduna í sjónvarpinu og elda súpu fyrir fjölskyldu sína sem hafði farið á skíði. Huggulegt í kuldanum á Íslandi.

Af hverju mætti Sólrún ekki? Kannski náðu þau hjónin ekki að redda pössun fyrir börnin, voru búin að skuldbinda sig í annað, höfðu ekki efni á ferðalaginu eða nenntu hreinlega ekki að gera sér ferð til Tenerife. Hún ein getur sagt til um það.