„Nú vitum við alla­vega að Danir eru mann­legir“

„Þetta kom mér reyndar ekkert svo mikið á óvart, því ég veit hversu mikil gæði búa í portúgalska liðinu, en nú vitum við allavega að Danir eru mannlegir“ sagði Melvyn Richardson, leikmaður Frakklands, fyrir leikinn.

Þetta var fyrsta tap Danmerkur á heimavelli í einhver tólf ár, en þeir eru strax komnir með upp í kok af taptilfinningunni.

„Tilfinningin er sú að við erum orðnir ógeðslega þreyttir á því að tapa. Við erum ekki vanir því í þessu liði, en á móti kemur tækifæri til að sýna hvað í okkur býr. Við fáum erfiðan andstæðing og þurfum að stíga upp, sýna karakter. Þetta verður alvöru próf fyrir okkur en við hlökkum til að takast á við það“ sagði Rasmus Lauge, leikmaður Danmerkur.

Einn besti rígur handboltans

Danmörk og Frakkland hafa mæst margoft undanfarin ár, í úrslitaleiknum á síðasta EM og úrslitaleiknum á þarsíðasta HM til dæmis.

„Þetta hefur verið einn besti rígur handboltans síðustu fimm eða sex ár. Yfirleitt eru þessi lið að keppa um verðlaun en þetta verður alvöru, alvöru slagur í kvöld“ sagði Dika Mem, leikmaður Frakklands.

„Við héldum að við værum eina liðið sem gæti unnið Danmörku, en svo kemur í Portúgal getur það líka, þannig að þeir eru ekkert óstöðvandi“ bætti Aymeric Minne við.