Hafði aldrei heyrt um hand­bolta fyrr en hún kynntist handboltaóðu þjóðinni

Jewells Chambers flutti fyrst til Íslands árið 2016 frá New York og hún hóf feril í ferðaþjónustu tveimur árum síðar. Hún heldur úti hlaðvarpi og samfélagsmiðlum undir heitinu All things Iceland og þar fjallar hún um Ísland frá sínu einstaka sjónarhorni.

„Ég hjálpa fólki að skipuleggja ferðir, við að skilja menninguna, tungumálið og náttúruna og hef bara gaman að því. Ég bendi á alls kyns hluti sem eru menningarlega öðruvísi. Þetta er að reynast virkilega skemmtileg leið til að hjálpa fólki að kynnast Íslandi.“

Ástríðufullur áhugi landsmanna á handbolta kom henni í opna skjöldu og skyldi engan undra þegar forsíður helstu fréttamiðla landsins líta eru yfirfullar af handboltafréttum þegar landsliðið keppir á EM.

Hélt að herra Rogers hefði fundið upp á íþróttinni

„Ég kynntist upphaflega handbolta óafvitandi þegar ég var unglingur í menntaskóla og ég hélt að leikfimikennarinn hefði búið til þennan leik. Hann sagði nefnilega aldrei að það væri keppt í þessu á alþjóðavettvangi og heldur ekki að margir hefðu mikinn áhuga og að þetta væri ólympíuíþrótt“

Hún hélt að íþróttakennarinn, hefði fundið upp á þessari einkennilegu íþrótt með því að blanda saman körfubolta og fótbolta.

„Það kom mér síðan mjög á óvart þegar ég flutti til Íslands árið 2016 og fólkið hér var á kafi í handbolta og talaði mikið um hann. Ég spurði hvað handbolti væri og kíkti á hann og sagði „hey ég spilaði þetta í menntaskóla!“ sagði Jewells og skellti upp úr.“

„Mér fannst svo skrýtið að ég skyldi ekki hafa haft hugmynd um að þetta væri áratugalöng hefð.“

Með handboltabakteríuna á stórmótum

Hún hrífst nú af íþróttinni, enda hefur hún búið hér í áratug.

„Þetta er svo mikill hluti af menningunni og fólk virkilega styður við liðið og hefur svo mikla ástríðu fyrir þessu. Ég hafði bara ekki hugmynd um að þetta væri til, sem er svo furðulegt því það er ekki svo langt í burtu. Maður hefði haldið að ég hefði heyrt um þetta því það eru lönd í Evrópu sem leggja hjartað í þetta. Núna þegar EM er í gangi þá erum kærastinn minn, fjölskyldan hans og sumir sem horfa yfirleitt ekki á handbolta, og þar á meðal ég, alveg á kafi í þessu.“

Happa að horfa með Evu litlu

Svo mun tíminn leiða í ljós hvort Eva, þriggja mánaða dóttir Jewels og Haraldar Ægis Guðmundssonar fái handboltabakteríuna líka.

Hann sagðist aðspurður ætla að leyfa Evu litlu að halda með sér í handboltaævintýrið mikla enda kúrir hún yfirleitt í fanginu á honum og fylgist með þegar Ísland er að spila.

Jewells heldur úti nokkrum samfélagsmiðlum þar sem hún fjallar um íslenska menningu með sínum einstaka hætti. Hægt er að fylgjast með ævintýrum hennar á Instagram, Facebook og Youtube.