Fara fram á síbrotagæslu yfir stjúpprinsinum sem var aftur hand­tekinn í gær

Samkvæmt umfjöllun norska ríkisútvarpsins NRK hófust réttarhöld klukkan þrjú síðdegis að staðartíma í Osló í dag þar sem dómstóllinn tók afstöðu til gæsluvarðhalds yfir Høiby sem farið var fram á vegna hættu á endurteknum brotum.

Þá hefjast lengri réttarhöld á morgun sem gert er ráð fyrir að standi yfir í sjö vikur vegna fjölda annarra fyrri brota sem hann er ákærður fyrir. Høiby neitar sök í þeim ákæruliðum sem varða alvarlegustu brotin, þar á meðal fyrir ofbeldi í nánu sambandi og fleiri ofbeldisbrot. Lögreglan fer fram á síbrotagæslu yfir norska stjúp-prinsinum, en ekki er gert ráð fyrir að hann verði sjálfur viðstaddur réttarhöldin í dag.

Sjá einnig: Ákærður fyrir fjórar nauðganir

Lögreglan hefur staðfest að Marius Borg Høiby hafi verið handtekinn í gærkvöldi, grunaður um líkamsárás, ógnandi tilburði með hnífi og brot gegn nálgunarbanni, og að farið hafi verið fram á síbrotagæslu yfir honum sökum þessa. Samkvæmt upplýsingum NRK er Høiby grunaður um að brjóta nálgunarbann gegn Frogner-konunni svokölluðu, en fyrr í þessum mánuði var hann kærður fyrir frekari brot á nálgunarbanni.

Síðustu dagar hafa verið stormasamir hjá norsku konungsfjölskyldunni en Mette-Marit, móðir Mariusar, hefur verið í kastljósi fjölmiðla vegna samskipta hennar við kynferðisbrotamanninn Jeffrey Epstein.

Uppfært kl. 15:30

Fréttin var uppfærð eftir að dómstóll í Osló tók afstöðu til gæsluvarðhalds yfir Mariusi Borg Høiby.