„Við erum ekkert að ein­beita okkur að því og ætlum bara að taka leikinn“

KR hefur unnið síðustu fjóra leiki í deildinni og síðustu sex leiki í öllum keppnum. Eina tap liðsins á þessu ári var þann 3. janúar, gegn Stjörnunni sem hefur fagnað sigri í síðustu tíu leikjum í öllum keppnum.

„Þetta eru svosem ekkert svakalega ólík lið, bæði lið vilja spila hraðan bolta á háu tempói. Stjarnan er mjög aggressívt lið, mjög orkumikið lið, sem byrjar leikina hratt og reynir að keyra yfir hitt liðið í byrjun. Það er eitthvað sem við verðum að vera tilbúnir í“ sagði Jakob Sigurðarson, þjálfari KR, í samtali við Vísi fyrir leik.

KR-ingar styrktu sig í janúar og fengu til sín tvo lettneska leikmenn sem hafa verið að spila vel, bakvörðinn Toms Leimanis og miðherjann Rinalds Malmanis. Fyrir hjá liðinu var hinn lettneski Linards Jaunzems.

„Já við fengum inn tvo nýja leikmenn og höfum verið að spila ágætlega frá áramótum. Átt marga góða leiki og svo nokkra sem voru allt í lagi, en við höfum verið að ná í sigra. Mér finnst við vera á réttri leið, liðið í heild sinni og nýju leikmennirnir sem hafa komið vel inn í hópinn.“

Giannis Agravanis, leikmaður Stjörnunnar, kýldi leikmenn Tindastóls í undanúrslitunum. Hann hefur hins vegar ekki verið dæmdur í leikbann því aganefnd KKÍ fundar bara á þriðjudögum.

Hvað finnst þér um að Giannis Agravanis sé að fara að spila í kvöld?

„Auðvitað hef ég mína skoðun, en ég hef ekkert rætt þetta við liðið mitt og er bara búinn að ákveða að ræða þetta ekkert fyrir leik. Við erum ekkert að einbeita okkur að því og ætlum bara að taka leikinn, svo get ég rætt þetta meira eftir leikinn.“

Yrði samt ekki extra sárt að sjá hann setja sigurkörfuna?

„Það væri bara súrt að sjá einhvern í hinu liðinu setja sigurkörfuna á okkur“ sagði Jakob léttur.

„En hann er klárlega góður leikmaður sem hjálpar þeim, en það er ekki þetta sem er aðalmálið. Allt Stjörnuliðið er gríðarlega vel mannað þannig að við þurfum bara að einbeita okkur að því að ná upp góðri frammistöðu hjá okkur.“