Keppandi Suður-Kóreu á Ólympíu­leikunum fæddist á Ís­landi

Ísdansarinn Ye Quan keppir fyrir Kóreu en hann er kínverskur, alinn upp í Kanada og það merkilegasta er að hann er fæddur á Íslandi og bjó þar fyrstu tvö ár ævi sinnar.

Ye Quan keppir ekki einsamall heldur er hann í skautaparakeppni með Hannah Lim. Þau sýndu rytmatísku æfingarnar sínar í ísdansinum í liðakeppninni á föstudaginn.

Ófrísk þegar hún flutti til Íslands

Móðir Ye Quan flutti til Íslands þegar hún varð ófrísk af honum. Ríkissjónvarpið rekur sögu fæðingarinnar

„Á þessum tíma vann hún í kínversku borginni Dalian sem túlkur fyrir fyrirtæki í eigu Ketils Helgasonar sem stóð í fiskútflutningi frá Íslandi til Kína. Dalian er staðsett á austurströnd Kína ekki langt frá landamærunum við Norður-Kóreu. Ketill og eiginkona hans, Ingibjörg Vagnsdóttir (alltaf kölluð Inga), voru með annan fótinn í Kína á þessum tíma og þau björguðu Li úr flóknum aðstæðum og tóku hana með sér til Íslands þegar hún var barnshafandi og komu henni í skrifstofuvinnu í Bolungarvík,“ segir í frétt RÚV.

Hjálpuðu þeim að flytja til Kanada

Þriggja ára voru mæðginin flutt til Montreal í Kanada. Ketill og Inga hjálpuðu mæðginunum við að flytjast til Kanada, en hjónin þekktu vel til þar. Ye hafði ekki búið lengi í Kanada þegar hann hóf skautaæfingar því hann var aðeins fimm ára. Fyrst í listhlaupi í einstaklingsflokki en síðar færði hann sig yfir í ísdansinn sem er parakeppni.

Bæði alin upp í Kanada

Frá árinu 2019 hefur hann dansað með Hönnuh Lim, sem er einnig alin upp í Kanada. Foreldrar hennar koma hins vegar frá Suður-Kóreu. Eftir að hafa dansað í tvö ár fyrir hönd Kanada kom upp sú staða að þau kepptu fyrir Suður-Kóreu vegna róta Hönnuh. Skautapör geta keppt undir fána annars keppandans á alþjóðlegum mótum en á Ólympíuleikum þurfa báðir að vera ríkisborgarar sama lands.

Það má lesa meira um þessa merkilegu sögu með því að smella hér.