Ís­lands­meistari í ólympískum lyftingum þremur vikum eftir að hún missti fóstur

Guðný Björk vann sinn flokk, -77 kílóa flokk, en varð einnig Íslandsmeistari í heildarkeppni með 256,697 Sinclair stig.

Guðný lyfti samtals 209 kílóum, 91 kílói í snörun og 118 kílóum í jafnhendingu. Hún lyfti 23 kílóum meira en næsta kona.

Þórbergur Ernir Hlynsson vann heildarkeppnina hjá körlunum með því að lyfta 325 kílóum og fá 362,741 Sinclair stig. Hér má finna öll úrslit á mótinu.

Eftir sigurinn í gær greindi Guðný frá sérstökum undirbúningi sínum fyrir þetta mót. Í raun hafði hún ekki ætlað að keppa á mótinu en örlögin gripu í taumana.

Var tilbúin í að leggja skóna á hilluna

„Ég komst að því að ég væri ólétt í lok árs 2025 og var tilbúin í að leggja skóna á hilluna í bili og stíga inn í draumahlutverkið að verða mamma,“ skrifaði Guðný Björk.

„Við vorum í skýjunum með þetta allt saman en fyrir þremur vikum vorum við svo rifin niður á jörðina þegar það byrjaði að blæða sem endaði með fósturmissi. Við erum mjög heppin með fólkið okkar sem hefur staðið þétt við bakið á okkur í gegnum mjög erfiðar vikur,“ skrifaði Guðný.

Mikið andlegt og líkamlegt áfall

„Þrátt fyrir mikið andlegt og líkamlegt áfall var ég strax mjög ákveðin í að keppa og í raun gaf þetta mér einhvern auka kraft og ég ætlaði mér að gera allt sem ég gæti til að mæta og gera mitt allra besta,“ skrifaði Guðný. Nú ætlar hún sér stóra hluti á tímabilinu og hefur sett stefnuna á Smáþjóðaleikana á Íslandi, Evrópumeistaramótið í Georgíu og heimsmeistaramótið í Kína.

„Okkar tími mun koma en núna er allur fókus á íþróttinni sem ég elska og ég er spennt fyrir keppnistímabilinu sem er fram undan,“ skrifaði Guðný.

Hún segir þetta það erfiðasta sem hún hefur gengið í gegnum en vildi deila sögu sinni ef það hjálpaði einhverjum.

„Ég vildi deila þessu ef það hjálpar einhverjum að heyra að þið eruð ekki einar af því það hjálpaði mér, knús á allar sem hafa misst, þetta er klárlega það erfiðasta sem ég hef gengið í gegnum,“ skrifaði Guðný.