Lindsey Vonn fót­brotnaði við fallið

Hin 41 árs gamla keppti aðeins níu dögum eftir að hafa slitið liðbönd í vinstra hné, en Vonn missti jafnvægið þegar hún rak skíðastafinn í hlið í fyrsta stökki og kom það í veg fyrir ævintýralegan endi á merkilegri sögu.

Vonn var flutt með þyrlu úr brekkunni á Ca Foncello-sjúkrahúsið í Treviso, um 130 km frá Olimpia delle Tofane í Dólómítafjöllum, eftir langa aðhlynningu.

Sjúkrahúsið sendi frá sér yfirlýsingu þar sem sagði að hún hefði gengist undir „bæklunaraðgerð til að koma á stöðugleika í brotinu sem hún hlaut á vinstri fæti“ – sama fæti og hún sleit krossband í.

Fyrr um daginn sagði í yfirlýsingu frá bandaríska skíðaliðinu að Vonn hefði „orðið fyrir meiðslum“ en væri í „stöðugu ástandi“.

Tvívegis heimsmeistarinn hafði lokið tveimur æfingaferðum í hinni þekktu braut fyrir fallið á sunnudag.

Samlandi hennar, Breezy Johnson, var með tárin í augunum þegar hún bætti ólympíugulli við heimsmeistaratitilinn sem hún vann í fyrra eftir að hafa náð frábærum tíma, einni mínútu og 36,10 sekúndum.

Hin þrítuga horfði á stóra skjáinn á marksvæðinu með höfuðið í höndunum þegar liðsfélagi hennar féll, en hún hafði lokið sinni ferð í sjötta sæti á meðan Vonn var þrettánda í rásröð.

Önnur bandarísk kona, Isabella Wright, horfði á fallið efst úr brekkunni áður en hún þurfti að ljúka sinni eigin ferð en sagðist hafa vonað að Vonn gæti lokið keppni þrátt fyrir krossbandsmeiðslin sem hún hlaut fyrir níu dögum.

„Ef einhver getur það, þá er það Lindsey. Hvað sem það er, eða hverjar sem aðstæðurnar eru, þá er hún mjög sterk. Við ætlum að styðja hana eins vel og við getum,“ sagði Wright.

„Hún átti betri endi skilið en þetta svo ég er miður mín fyrir hennar hönd. Ég vonast til að hitta hana og bara styðja hana. Ég veit að hún er í góðum höndum núna. [Ég] bíð spennt eftir að sjá hana,“ sagði Wright.

Emma Aicher frá Þýskalandi var 0,04 sekúndum á eftir og tók silfurverðlaunin, á meðan ítalski heimamaðurinn Sofia Goggia tryggði sér bronsið.