Mega ekki kenna haframjólk við mjólk

Hagsmunasamtök mjólkurframleiðenda stefndu sænska drykkjarframleiðandanum Oatly vegna þess að það hefur notað orðið „mjólk“ um hafradrykk sinn sem alla jafna er kallaður haframjólk á íslensku.

Dómur féll mjólkuframleiðendum í vil í gær. Hann þýðir að Oatly má ekki lengur nota orðið mjólk í vörumerkjum sínum eða í slagorðinu „síðmjólkurkynslóðinni“ (e. post milk generation), að því er segir í frétt breska blaðsins The Guardian.

Málið hefur velkst um fyrir breskum dómstólum undanfarin ár. Hugverkastofa Bretlands hafnaði í fyrstu slagorði Oatly þar sem það væri villandi. Dómstóll ógilti þá ákvörðun síðar sem leiddi til þess að málið fór á endanum alla leið fyrir æðsta dómstól landsins.

Judith Bryans, forstjóri Mjólkurvara Bretlands (Dairy UK), segir niðurstöðuna mikilvæga fyrir geirann og að hún eyði óvissu. Hún tryggi að merking orðsins mjólkur verði áfram skýr í hugum neytenda.

Talsmenn Oatly sögðu dóminn aftur á móti stríða gegn samkeppnissjónarmiðum og að hann kæmi breskum neytendum illa. Sá eini sem hagnaðist á niðurstöðunni væri mjólkuriðnaðurinn.