Dramatískur sigur hjá Tryggva og fé­lögum á Kanarí­eyjum

Bilbao heimsótti Dreamland Gran Canaria á Kanaríeyjum og vann að lokum eins stigs sigur, 98-97.

Justin Jaworski setti niður þriggja stiga körfu þremur sekúndum fyrir leikslok sem tryggði liðinu sigur. Luke Petrasek hafði sett niður þrist til að tryggja liðinu framlenginguna.

Tryggvi Snær var næststigahæstur hjá Bilbao með 16 stig en sá stigahæsti var Luke Petrasek með 20 stig. Tryggvi fékk fimm villur og villuvandræðin sáu til þess að hann spilaði bara 26 mínútur. Hann nýtti þær mínútur vel.

Tryggvi var einnig með 5 fráköst, 2 stoðsendingar og 2 varin skot. Tryggvi tróð líka boltanum þrisvar í kvöld.

Tryggvi nýtti fjögur af átta skotum utan af velli og setti niður átta af tíu vítum sínum.