Efins um að ráða Carrick til fram­búðar: „Maður er brenndur af fyrri tíð“

United kom til baka og vann 2-1 sigur á Crystal Palace á Old Trafford á sunnudaginn var. Þetta var sjötti sigur Rauðu djöflanna í sjö leikjum undir stjórn Carricks sem var ráðinn þjálfari liðsins til loka tímabilsins eftir að Ruben Amorim var rekinn.

United er komið upp í 3. sæti ensku úrvalsdeildarinnar eftir gott gengi í síðustu leikjum en þrátt fyrir það er Aron ekki sannfærður um að Carrick sé rétti maðurinn til að stýra Manchester-liðinu næstu árin.

„Ég er ekki þar, ennþá allavega. Ástæðan fyrir því er að maður er brenndur af fyrri tíð,“ sagði Aron í Sunnudagsmessunni og vísaði þar til Ole Gunnars Solskjær sem var ráðinn stjóri United fyrir nokkrum árum eftir að hafa upphaflega tekið við liðinu til bráðabirgða.

Aroni finnst spilamennska United í allra síðustu leikjum ekki hafa verið nógu góð. 

„Auðvitað er hann [Carrick] að gera helvíti gott tilkall til starfsins en að sama skapi var leikurinn í dag [í fyrradag] ekkert frábær. Af hverju komu þeir svona út í fyrri hálfleikinn? Leikurinn á móti Everton var ekki sannfærandi en þeir unnu báða leikina. Leikurinn á móti West Ham var skelfilegur en þeir náðu samt jafntefli í lokin. Leikurinn gegn Tottenham var lala þar til Tottenham fékk rautt spjald,“ sagði Aron. 

„Þeir byrjuðu á flottum frammistöðum en þær hafa ekkert verið rosalega góðar að undanförnu. En þeir fá alltaf þrjú stig og það er það sem skiptir mestu máli í fótbolta. En framhaldið; ég vil aðeins meiri tíma til að ákveða mig.“

Næsti leikur United er gegn Newcastle United á St James' Park annað kvöld.

Innslagið úr Messunni má sjá í spilaranum hér fyrir ofan.