„Einn stærsti sigur hjá fé­laginu í körfu­bolta“

„Menn voru virkilega glaðir enda var þetta risasigur fyrir okkur. Þetta er einn stærsti sigur hjá félaginu í körfubolta. Við ætlum að fá að njóta þess í kvöld en svo förum við að einbeita okkur að Grindavík sem er næsti leikur,“ sagði Steinar afar ánægður með sigurinn.

Fyrri hálfleikur var kaflaskiptur þar sem Ármann byrjaði betur en Þórsarar tóku við í öðrum leikhluta og fóru í tíu stiga áhlaup. Staðan í hálfleik var 42-43.

„Við byrjuðum betur en svo tók Lárus leikhlé og þeir komu sterkir út úr leikhléinu og spiluðu góða vörn og við fórum að tapa óþarflega mörgum boltum. Við náðum að halda út en svo duttum við í rugl en þessi endurkoma okkar var gríðarlega sterk.“

Aðspurður út í tilfinninguna farandi inn í fjórða leikhluta og spennustigið sagði Steinar að það hafi verið mjög gaman að spila þennan leik sem minnti á úrslitakeppnina.

„Það var fullt af fólki í stúkunni og æsingur og læti. Þetta var eins og í úrslitakeppninni en við erum ekki að fara þangað en fengum að upplifa hana í kvöld. Það eru tveir leikir eftir og við þurfum að halda áfram.“

Ármann fór úr fallsæti með sigri og Steinar var mjög ánægður með hvernig liðið hefur brugðist við mótlætinu í vetur.

„Ég er hvað stoltastur af hvað menn hafa verið samheldnir í liðinu. Auðvitað hafa menn verið brjálaðir eftir ákveðna leiki en við höfum alltaf komið til baka og það er trú í liðinu sem hefur hjálpað mikið,“ sagði Steinar Kaldal að lokum.