Rýma svæði í Austur-Finn­landi vegna úkraínsks sprengju­dróna

Landamæraverðir í Parikkala í Norður-Karelíu girtu af svæði í kringum vatnið Pyhäjärvi og flugumferð var bönnuð yfir það í gærkvöldi, að sögn finnska ríkisútvarpsins. Vatnið er nærri landamærum Finnlands að Rússlandi.

Íbúar í nágrenninu voru varaðir við því í morgun að háir hvellir gætu heyrst á meðan viðbragðsaðilar væru að störfum á vatninu.

Nokkrir úkraínskir drónar hafa brotlent í Finnlandi undanfarna daga, þar á meðal tveir nærri borginni Kouvola.

Úkraínsk stjórnvöld hafa beðist afsökunar á uppákomunum. Drónarnir eru taldir tengjast drónaárásum Úkraínumanna á olíuhafnir Rússa við Finnlandsflóa. 

Rússneskir drónar hafa einnig brotlent í nágrannaríkjum Úkraínu í stríðinu sem hefur nú geisað af fullum krafti í rúm fjögur ár.