Ás­geir Karl og Tristan Máni unnu brons á EM

Þetta er annað sinn sem Ísland vinnur brons á EYC móti en fyrir tveim árum vann Mikael Aron Vilhelmsson brons í Masters keppninni og árið 2011 vann Arnar Davíð Jónsson gull í Masterskeppninni.

Ásgeir Karl og Tristan Máni léku í fjórða og síðasta riðli tvímenningskeppninnar og enduðu í 2. sæti riðilsins, með 2.705 pinna eða 225,4 í meðaltal. Aðeins Danirnir Tobias Kastfelt Bryde og Oscar Emil Porskrog gerðu betur í þeim riðli með 2.936 pinna eða 244,7 stig að meðaltali, í leikjunum sex.

Danirnir reyndust hafa náð besta árangrinum af 54 pörum í tvímenningnum og þurftu Íslendingarnir að mæta þeim í undanúrslitunum. Þar munaði sáralitlu að íslensku strákarnir hefðu betur en Danirnir unnu að lokum 449-438. 

Í umfjöllun á vef keilusambandsins segir að úrslitin hafi ráðist í síðasta kasti Ásgeirs í 10. ramma, þar sem hann fékk erfiða 8 glennu. Hefði hann náð betra kasti, feykju og 9 í bónuskasti þá hefðu íslensku strákarnir komist í úrslitaleikinn.

Sú varð ekki raunin og unnu Danirnir par frá Úkraínu í úrslitaleiknum. Ekki er spilað sérstaklega um 3. sætið og því hlutu íslensku strákarnir brons, sem og par frá Austurríki.