Bjart­sýnn á að spila aftur eftir þriggja hæða fall

Pavan var meðal keppenda á Opna suðurafríska mótinu í golfi í febrúar en kvöldið fyrir mótið varð hann fyrir alvarlegu slysi. Hann hafði kallað á lyftu og steig inn þegar dyrnar opnuðust en þar var engin lyfta.

Hann féll niður þrjár hæðir eftir fall niður lyftustokkinn. Hann var fluttur beinustu leið á sjúkrahús með alvarlega áverka á öxl, nokkra brotna hryggjarliði ásamt fleiri meiðslum. Hann fór í bráðaaðgerð á bæði baki og öxl.

Hann sagðist eftir aðgerðina í febrúar vera heppinn að geta gengið. Þá virðist bjart yfir honum þessi dægrin, er hann lítur til framtíðar.

„Það er erfitt að segja til um eitt endamarkmið en það eru ákveðin skref. Eftir þrjá mánuði sjáum við hversu vel beinin hafa gróið og eftir sex mánuði hvort beinin eru fullgróin og staðan á liðum tekin,“ segir Pavan.

„Öxlin er krefjandi liðamót að eiga við. Vonandi er minna en ár í að ég geti spilað af fullum krafti en það eru margir óvissuþættir. Ég er vongóður og það eina sem ég get gert er að einblína að bættri stöðu dag frá degi.“