Milwaukee Bucks til­búið að skipta Giannis

ESPN greinir frá því að Milwaukee sé tilbúið að hlusta á tilboð í Giannis.

Ljóst er að mörg félög munu reyna að krækja í þennan öfluga leikmann sem varð NBA-meistari með Milwaukee 2021.

Milwaukee átti í viðræðum um möguleg skipti á Giannis fyrir lok félagaskiptagluggans í febrúar en ekkert varð úr þeim.

Talið er að Milwaukee hefji nú aftur viðræður við áhugasöm lið og niðurstaða í mál Giannis fáist í kringum nýliðavalið í lok júní.

Fyrir ári lýsti Giannis yfir áhuga á að yfirgefa Milwaukee og ganga í raðir New York Knicks. Ekkert varð þó af þeim skiptum.

Staðan í Milwaukee hefur verið eldfim undanfarna mánuði en Giannis óskaði eftir því að NBA rannsakaði Bucks eftir að félagið hætti að nota hann undir lok tímabilsins vegna hnémeiðsla.

Giannis lék aðeins 36 leiki í deildarkeppni NBA í vetur. Í þeim var hann með 27,6 stig, 9,8 fráköst og 5,4 stoðsendingar að meðaltali.

Milwaukee valdi Giannis með 15. valrétti í nýliðavalinu 2013. Hann var valinn verðmætasti leikmaður tímabilsins (MVP) 2019 og 2020. Giannis var svo valinn besti leikmaður úrslitaeinvígisins þegar Milwaukee varð meistari fyrir fimm árum.

Talið er að Golden State Warriors, Miami Heat, Minnesota Timberwolves, Boston Celtics og Knicks séu meðal félaga sem vilji semja við Giannis sem verður 32 ára í byrjun desember.