„Þeir eru bara dóna­legir og rífast til baka“

Andri Már spurði Emil hvar leikurinn hefði farið frá Haukunum í kvöld en Emil vildi meina að sigur hefði í raun verið möguleiki allt til loka. Hann var nokkuð óákveðinn í svörum en dómararnir voru honum greinilega ofarlega í huga.

„Ég veit það ekki. Mér fannst þetta svo sem vera leikur eiginlega allan tímann, aldrei fara einhvern veginn alveg framhjá okkur. Ég veit það ekki, mér fannst þær fá að komast mikið upp með að „hand check-a“ okkur og mjög erfitt að fara í gegnum „pick-in“, þær voru alltaf eitthvað að grípa í mjöðmina. Við verðum bara að vera sterkari. Við verðum einhvern veginn að berjast í gegnum það, það er ekkert annað sem við getum stjórnað.“

Njarðvík fékk 17 víti í fyrri hálfleik svo það lá beinast við að spyrja hvort Haukarnir hefðu einfaldlega verið að spila of grófan leik en Emil vildi meina að það hefði frekar verið Njarðvík sem var að spila gróft.

„Mér fannst þær mjög grófar. Mér fannst þær koma ógeðslega fast og fá engar villur. Þannig að ég, ég veit það ekki. Jú, jú. Ætli við höfum ekki verið grófar. Við fengum villurnar.“

Emil fékk engar skýringar frá dómurunum á þeirri línu sem dæmt var eftir í kvöld. Hann hætti þó að lokum að ræða dómgæsluna og færði fókusinn yfir á sitt eigið lið og þeirra frammistöðu.

„Nei, þeir eru bara dónalegir og rífast til baka ef ég ætla að fá einhverjar skýringar. Þeir koma með engar skýringar. Við verðum bara að einbeita okkur að því sem við getum stjórnað. Það eru ekki dómararnir. Við getum bara verið fastari. Við getum tekið fleiri fráköst. Við leyfðum þeim að taka 15 sóknarfráköst, við getum verið miklu sterkari þar. Leyfðum þeim svolítið að ýta okkur úr því sem við vildum gera. Við þurfum bara að vera sterkari fyrir.“

Undir lokin varð leikurinn hörkuspennandi og eins og Emil nefndi í byrjun þá hefðu bæði lið getað klárað þetta en sóknarleikurinn brást Haukunum þegar mest á reyndi.

„Þetta var bara hörkuleikur og örugglega skemmtilegur leikur að horfa á. Þær eru bara með góða leikmenn líka sem geta klárað leikinn. Það sem við vorum að leita að, við frusum aðeins sóknarlega.“

Haukar eru nú sannarlega komnir með bakið upp við vegg og Andri spurði að lokum hvort að það væri raunhæft fyrir Hauka að gera hið ómögulega og vinna þrjá leiki í röð en Emil er bjartsýnn þrátt fyrir erfiða stöðu.

„Það er ekkert ómögulegt. Við gerðum það í fyrra í 8-liða úrslitum gegn Grindavík og getum alveg gert það aftur.“