Ingi­mar verður bæjar­stjóri í Hvera­gerði

Í fréttatilkynningu þess efnis segir að mikill samhljómur hafi verið meðal framboðanna í aðdraganda kosninga og finna hafi mátt margar sameiginlegar áherslur í stefnumálum þeirra. Þessi samhljómur hafi skapað sterkan grundvöll fyrir samstarfi. Viðræður D-listans og S-listans hafi verið góðar og einkennst af trausti, málefnum og sameiginlegum vilja til að vinna af ábyrgð fyrir Hveragerði á komandi kjörtímabili.

Ábyrgð – Bæjarbragur – Lífsgæði

„Mér þykir einstaklega vænt um Hveragerði. Hér ólst ég upp og hér líður mér best. Það er mikill heiður að fá að starfa í þágu Hvergerðinga. Við erum metnaðarfull, höfum skýra sýn og er ég, ásamt þessu frábæra fólki á D-listanum og S-listanum, tilbúinn að leiða Hveragerði inn í framtíðina,“ er haft eftir Ingimar Guðmundssyni, verðandi bæjarstjóra Hveragerðis. 

Framboðin hafi gert með sér málefnasamning undir yfirskriftinni Ábyrgð – Bæjarbragur – Lífsgæði. Þar komi meðal annars fram að markmið samstarfsins sé að sameina áherslur um ábyrga fjármálastjórn, vandaða stjórnsýslu, sterka þjónustu við íbúa, verndun bæjarbrags, öfluga lýðheilsu, græn svæði og fjölbreytt samfélagslíf.

Kom skemmtilega á óvart

„Viðræðurnar voru mjög góðar, uppbyggilegar og lausnamiðaðar frá fyrsta degi. Það kom mér skemmtilega á óvart hversu mikill samhljómur var í stóru málunum. Við deilum sameiginlegri sýn um ábyrga stjórnsýslu, sterka þjónustu og metnaðarfulla framtíð fyrir Hveragerði. Ég hlakka til þess að fá að vinna með þessum öfluga hópi að áframhaldandi uppbyggingu samfélagsins okkar,“ er haft eftir segir Birgittu Ragnarsdóttur, oddvita S-listans og verðandi formaður bæjarráðs. 

Í málefnasamningnum séu tilgreind nokkur verkefni sem verði sett sérstaklega í forgang. Þar megi meðal annars nefna að aðalskipulag verði endurskoðað með aðkomu íbúa, hugað verði að því að nýr gervigrasvöllur verði nothæfur yfir vetrartímann og að sett verði upp stöðuyfirlit yfir kostnaðarsöm verkefni og stærri framkvæmdir sem bærinn stendur frammi fyrir.