Ræða mögu­leika á næsta á fundi í kjara­deilu Icelandair

Vísir greindi frá því í gær að Félag íslenskra atvinnuflugmanna hefði lagt til svokallaða fleytilausn í deilunni. Hefði hún orðið fyrir valinu yrðu gerðir skammtímasamningar til að skapa starfsfrið yfir sumarvertíð Icelandair. Með skammtímasamningnum yrðu stór deiluefni lögð til hliðar.

Stóru málin sem styr hefur staðið um varða fyrirætlanir Icelandair um kaup á 49% hlut í félaginu Play Europe sem er með flugrekstrarleyfi á Möltu. Þar stendur deilan á því hversu stór hluti af rekstri Icelandair fer þar undir og hvort notast verði við stéttarfélagsbundna flugmenn.

Annað stórt atriði sem deilt er um er vinnuframlag flugmanna sem jókst um 22% við undirritun kjarasamninga árið 2020 og var liður í endurreisn félagsins. Nýting fór úr 525 flugtímum á ári í 640 flugtíma á ári en flugmenn vilja meina að sú nýting hafi aukist á samningstímanum.

Næst stærsti hluthafi Icelandair segir óbreytta stöðu ekki valkost

Þá er einnig deilt um að Icelandair fái auknar heimildir til að stunda svokallaða blautleigu, þar sem félagið myndi leigja flugvél ásamt áhöfn af öðru flugfélagi til að sinna áætlunarflugi fyrir Icelandair. Heimild er til þess innan kjarasamninga í undantekningartilvikum í dag. 

Icelandair hefur aflýst tuttugu áætlunarferðum síðasta mánuðinn vegna mönnunarvanda, sem fyrirtækið rekur til samstilltra aðgerða flugmanna sem felast í því að þeir neiti að selja frídaga, sem hafi síðast gerst árið 2014 þegar flugmenn áttu í kjaradeilu við félagið. Flugmenn hafna því og segja ábyrgðina alfarið á herðum Icelandair sem ætli að láta flugáætlun félagsins standa og falla með kaupum á frídögum flugmanna.

Þrátt fyrir aflýsingarnar komust um 98 prósent ferða Icelandair á áfangastað í maí samanborið við 99 prósent í maí í fyrra. Stundvísi félagsins var um 80 prósent í mánuðinum, samanborið við 84 prósent á sama tíma í fyrra.