Lækka verð á öllum súkku­laði­vörum um tíu prósent

Sjá má í verðlagseftirliti ASÍ að Nóa rjómasúkkulaði, 150 grömm, kostaði þannig í Bónus fyrir tveimur dögum 535 krónur en 595 krónur í maí. Verðið er nú svipað og það var í júlí 2025 þegar súkkulaðistykkið kostaði 529. Til samanburðar kostaði stykkið 359 krónur í september árið 2023.

Ef skoðaðar eru 460 gramma súkkulaðirúsínur og verðið á þeim í Krónunni má sjá að pokinn kostaði í júní 1079 krónur en 1199 í maí. Verðið er nú svipað, í Krónunni, og það var í september 2025 þegar pokinn kostaði 1099 krónur. Til samanburðar kostaði pokinn 749 krónur í júní 2023.

Ef skoðað er verð á Nóa kroppi, 240 gramma poka, í Bónus, má sjá svipaða sögu. Pokinn kostar nú 773 krónur en kostaði í maí 859 krónur. Verðið er nú svipað og það var í júní 2025 þegar pokinn kostaði 759 krónur. Til samanburðar kostaði hann 559 krónur í september 2023.

Hrun á heimsmarkaðsverði

Töluvert hefur verið fjallað um hærra verð á súkkulaði síðustu ár og mánuði vegna hækkunar á heimsmarkaðsverði á kakói. Verðið hrapaði um páskana en hefur hækkað örlítið frá þeim tíma. Framkvæmdastjórar Nóa Síríus og Freyju sögðust um páskana ekki getað lækkað verðið strax en boðuðu verðlækkanir með sumrinu.

Í tilkynningu frá Nóa Síríus segir að undanfarin ár hafi verið fordæmalaus í verðlagningu á hrávöru til súkkulaðiframleiðslu. Þurrkar og erfið ræktunarskilyrði á helstu kakósvæðum heimsins hafi haldið heimsmarkaðsverði á kakói og kakósmjöri í sögulegum hæðum, sem hafi kallað á verðhækkanir hjá framleiðendum víða um heim.

Nú hafi dregið úr þessum þrýstingi og það, ásamt hagræðingu og bættum framleiðsluferlum, hafi skapað svigrúm hjá þeim til að lækka verð.

„Þegar hrávöruverð hækkaði lögðum við mikið á okkur til að mæta auknum kostnaði með hagræðingu, breyttum verkferlum og stöðugum samskiptum við birgja og viðskiptavini. Það varð til þess að verð hjá okkur hækkaði minna en sem nam breytingum á heimsmarkaðsverði. Nú þegar verð á helsta hráefninu í framleiðslunni er stöðugra viljum við stíga fyrstu skref í að skila ávinningi áfram til viðskiptavina,“ segir Sigríður Hrefna Hrafnkelsdóttir, forstjóri Nóa Síríus, í tilkynningunni.

Fjallað var um það í mars á þessu ári að sjóður í stýringu Alfa framtaks hefði samið við norska matvælaframleiðslurisann Orkla Snacks um kaup á öllu hlutafé í sælgætisgerðinni Nóa Siríus. Orkla gekk frá kaupum á Nóa Siríus árið 2021 og því var fyrirtækið aftur komið í innlenda eigu.