Bætti heims­met í míluhlaupi sem hafði staðið í 27 ár

Hinn 28 ára gamli Kerr hljóp mílu á Demantamóti í Lundúnum, eða fjóra hringi í kringum völlinn á London Stadium, rétt í þessu og sló metið. Eins og hann hafði lofað í aðdraganda mótsins.

Hann hefur stefnt að heimsmetinu síðan hann lýsti því opinberlega yfir í mars að það yrði slegið á þessu ári og vakið mikla athygli fyrir að sýna frá undirbúningi sínum á YouTube.

Kerr hefur hingað til aðallega keppt í 1500 metra hlaupi, örlítið styttra en míluhlaupi sem er 1609,34 metrar. Hann varð heimsmeistari í greininni árið 2023 og vann silfurverðlaun á Ólympíuleikunum 2024. 

Í míluhlaupinu í dag sló hann í leiðinni sinn besta tíma í 1500 metra hlaupi, 3:27,79, um þrjá hundraðshluta, þó það færist ekki formlega til bókar.

Gríðarleg fagnaðarlæti brutust út á London Stadium þegar metið var í höfn hjá Kerr og meðal þeirra sem sátu í stúkunni var Sebastian Coe, forseti alþjóða frjálsíþróttasambandsins og fyrrum heimsmethafi í míluhlaupi.

Kerr mun reyna að bæta nýslegið heimsmet sitt á Samveldisleikunum sem haldnir verða í Glasgow í Skotlandi um næstu mánaðamót.