Berg­lind Katla valin í A-landsliðið að­eins 16 ára

Íslenska kvennalandsliðið í körfubolta á tvo vináttuleiki gegn Portúgal seinna í vikunni. Leikið verður bæði á föstudaginn og laugardaginn í Portúgal en fjórtán leikmenn voru valdir til að taka þátt í þessu verkefni.

Það vakti athygli að Berglind Katla Hlynsdóttir var valin í hópinn en hún er aðeins 16 ára gömul. Berglind Katla er nýkomin frá Ioannina í Grikklandi þar sem hún var að leika með U16 landsliði Íslands í B-deild Evrópumótsins. Þar stóð hún sig frábærlega og var valin besti leikmaður B-deildarinnar.

Þar skoraði hún að meðaltali yfir 32 stig í leik og tók að auki meira en átta fráköst að meðaltali á mótinu.

Berglind Katla spilar með Stjörnunni í Bónusdeild kvenna þar sem hún hefur spilað vel. Hún spilaði stórt hlutverk fyrir Stjörnuna og varð yngsti leikmaður í sögu úrslitakeppninnar á Íslandi til að skora tuttugu stig.

Í nóvember spilar landsliðið þrjá umspilsleiki fyrir Eurobasket sem fer fram árið 2029.