Vilja frið en ætla ekki að gefast upp

Þetta er meðal þess sem kom fram í löngu ávarpi forsetans sem hann birti á samfélagsmiðlum. Tilefnið er að í dag eru 35 ár liðin frá því að Úkraína öðlaðist sjálfstæði frá Sovétríkjunum sálugu.

Í ávarpinu fór Selenskí um víðan völl en hann varði töluverðum tíma í að ræða hetjudáð úkraínskra hermanna og fórn þeirra. Þakkaði hann öllum þeim sem höfðu þjónað og sagði úkraínska herinn vera orðinn þann besta í allri Evrópu.

Hann sagði að Rússar hefðu talið Úkraínumenn eins og yngri bróður en það hefði sýnt sig að þessar þjóðir væru svo gott sem ókunnugar, þar sem Rússar vissu ekki hvað það þýddi að hundruð þúsunda sjálfboðaliða stigu fram til að verja það sem þeim þótti vænt um.

Seinna í ávarpinu sagði Selenskí einnig að Pútín væri fastur í fortíðinni. Hann sæi Úkraínu ekki í raunverulegu ljósi, heldur eingöngu eins og ríkinu væri lýst í skýrslum í Kreml.

Ætla ekki að gefast upp

„Úkraína vill frið en við ætlum ekki að einfaldlega gefast upp,“ sagði Selenskí. Hann sagði að undanfarin 35 ár hefðu Úkraínumenn heyrt margar dómsdagsspár um ríki sitt en þær hefðu allar reynst rangar.

Vísaði hann sérstaklega til þess þegar innrás Rússa hófst árið 2022 og spár um að varnir Úkraínumanna myndu fljótt fjalla saman. Það hefði ekki gerst og Úkraínumenn hefðu staðið í hárinu á Rússum í 1.643 daga.

Sjá einnig: Færir Selenskí eldflaugateikningar

Selenskí sagði að Rússum yrði ekki leyft að blekkja heiminn varðandi það að Úkraína þyrfti eingöngu að gefa eftir Donbas-héraðið til að binda enda á stríðið. Rússum væri ekki treystandi og sagði hann að Úkraínumenn myndu ekki hjálpa Pútín og félögum við að bjarga lífum hálfrar milljónar rússneskra hermanna.

„Pútín vonar að við séum þreytt. En við vitum að hann er dauðlegur. Hann hefur aldrei skilið okkur og nú hefur hann ekki tíma til þess,“ sagði Selenskí.

„Þú vildir taka alla Úkraínu, allt ríki okkar. Þess í stað hefur þú tapað olíuvinnslum, flota þínum, gróða og heilli kynslóð sem þú sendir í hakkavélina.“

Munu finna lausn á skotflaugum Pútíns

Hann ræddi einnig þá erfiðu stöðu sem hefði skapast vegna skotflaugaárása Rússa, sem Úkraínumenn eru að miklu leyti varnarlausir gegn. Finna þyrfti lausn við þessum árásum, eins og Úkraínumenn hefðu áður gert gagnvart ýmsum tegundum árása Rússa.

Þeir myndu einnig finna lausnir á þessum árásum.

Selenskí sagði frá því um helgina að leggja ætti sérstaka áherslu á það að granda skotpöllum Rússa í Rússlandi. Nauðsynlegt væri að finna þá og gera árásir á þá en þannig væri hægt að fækka skotflaugaárásum á Úkraínu.