Nýr og umdeildur Gotti tekinn úr loftinu

Oddur Ævar Gunnarsson skrifar 25. ágúst 2026 19:02

Selma Rut Þorsteinsdóttir formaður Samtaka íslenskra auglýsingastofa segir fólk í bransanum hugsi yfir notkun gervigreindar.

Nýjar auglýsingar frá Mjólkursamsölunni með ostastráknum Gotta hafa verið teknar úr birtingu en þær vöktu hörð viðbrögð á samfélagsmiðlum þar sem útlit er fyrir að gervigreind hafi verið nýtt til verksins.

Flestir landsmenn muna eftir gömlu góðu Gotta auglýsingunum um ostinn frá MS. Nýjar auglýsingar Mjólkursamsölunnar sem birtust á samfélagsmiðlum virðast hinsvegar hafa farið öfugt ofan í fólk ef marka má miðlana og miklar umræður um meinta notkun gervigreindar við verkið.

Viðbrögðin voru hörð og auglýsingarnar hafa nú horfið af samfélagsmiðlum. Samkvæmt svari frá MS er gervigreind framleiðslutæki sem hafi ekki komið í staðinn fyrir skapandi fagfólk.

Selma Rut Þorsteinsdóttir formaður Sambands íslenskra auglýsingastofa segir auglýsendur hugsi yfir innreið gervigreindar, sem sé þrátt fyrir allt um margt nytsamleg tækni.

„Ég held að við sem samfélag séum ekki alveg búin að ákveða hvað okkur finnst um hversu langt gervigreindin má fara í list og hönnun og sköpun og við kannski erum bara að átta okkur á því núna.“

Svar MS við fyrirspurn fréttastofu:

Sæll, MS hefur eftirfarandi um málið að segja:

Við skiljum vel að breytingar á kunnuglegum karakter geti vakið viðbrögð og að notkun gervigreindar veki umræðu.

Það er okkur mikilvægt að koma því á framfæri að efnið með Gotta er ekki unnið af gervigreind í stað skapandi fagfólks. Að baki því stendur þverfaglegur hópur hugmyndasmiða, hönnuða og textahöfunda. Gervigreind er framleiðslutæki og er nýtt samhliða þeirri tækni sem við höfum þekkt til um árabil. Mannleg hugmyndavinna og sköpun er áfram grunnurinn að öllu efni.

Við berum mikla virðingu fyrir skapandi samfélagi og hlustum á þau ólíku sjónarmið sem okkur berast.

Okkur þykir vænt um Gotta og munum kappkosta að fara vel með vörumerkið sem fylgt hefur þjóðinni í áratugi.

Almennt hafi auglýsingastofur hingað til forðast að nota gervigreindina alfarið við hönnun auglýsinga. Ljóst sé að upprunalegir hönnuðir Gotta hafi verið fólk af holdi og blóði.

„Fólk sem var virkilega tengt samfélaginu og samtímanum, með gott innsæi og fann upp þessa herferð og karakter, þannig fólki þykir vænt um karakterinn og ég held að það sé kannski það sem málið snýst um.“

Miðað við ykkar áherslur þá heyri ég á þér að það sé ekki mjög líklegt að meirihluta auglýsinga verði gerðar alfarið með gervigreind, það hljómar eins og það sé ekki eftirspurn eftir því, hvernig blasir þetta við þér?

„Ég allavega vona innilega ekki því skapandi fólk þarf að fá að skapa og ég held að mennskan í sköpuninni og í rauninni ófullkomleikinn þar, það er það sem á endanum tengir alltaf fólk við annað fólk.“

Auglýsinga- og markaðsmál

Mest lesið

Fleiri fréttir