Wolt sendlar lögðu niður störf

Ríkisútvarpið greindi frá því fyrr í dag að sextíu sendlar hefðu lagt niður störf í morgun og safnast saman fyrir utan höfuðstöðvar Wolt á Íslandi í Ármúla. Sendlarnir segja að laun þeirra séu lág og að þau hafi lækkað um tæpan helming á þessu ári. Þetta er ekki í fyrsta sinn sem kastljósið beinist að launakjörum Wolt sendla en ASÍ sagði í febrúar á þessu ári að viðskiptamódel fyrirtækisins grafi undan kjarasamningsbundnum réttindum.

„Við hjá Wolt tökum ábendingum sendla alvarlega og leitum nú eftir opnu og uppbyggilegu samtali við sendlana þar sem við getum farið yfir stöðuna í sameiningu. Við virðum rétt allra til að koma áhyggjum sínum á framfæri og mótmæla með friðsamlegum hætti. Við erum að fara yfir þau mál sem hafa komið fram og viljum ræða þau beint við sendlana til að skilja betur þeirra sjónarmið og hvað megi bæta,“ segir Jóhann Már Helgason framkvæmdastjóri Wolt á Íslandi í yfirlýsingu til Vísis.

Hann segir markmið fyrirtækisins vera að bjóða fyrirkomulag sem sameini sveigjanleika, gagnsæi og tekjumöguleika til lengri tíma. Sendlar sjái fyrirfram hvað þeir fái greitt fyrir hverja sendingu áður en þeir samþykki hana. Þannig geti þeir tekið upplýsta ákvöðun um hvaða sendingar þeir taka að sér og hvenær þeir sinni þeim.

„Við söfnum reglulega ábendingum frá sendlum og nýtum þær til að bæta upplifun þeirra af því að nota Wolt. Ánægja sendla á Íslandi mælist nú 4,75 af 5, samanborið við 4,7 af 5 að meðaltali árið 2025. Þótt niðurstaðan sé jákvæð breytir hún ekki því að taka þarf þær áhyggjur sem nú hafa komið fram alvarlega. Við munum halda samtalinu við sendlana áfram og fara yfir með þeim hvað hægt sé að gera betur.“