Biðst af­sökunar og af­salar sér sigrinum

Wietrzyk baðst í dag innilega afsökunar á atvikinu sem átti sér stað í Hyrox-keppni í Peking á laugardag. Hún hafi átt að taka aðra ákvörðun meðan á keppninni stóð og dregið sig úr keppni þar og þá.

Atvikið fór víða á samfélags- og fréttamiðlum og leiddi til þess að Moritz Fürste, stofnandi Hyrox, baðst afsökunar og tók reglur keppnanna í gegn, líkt og fjallað var um á Vísi í gær.

Í yfirlýsingu sem hún deildi á samfélagsmiðlum í dag sagði Wietrzyk:

„Ég veit að gjörðir mínar höfðu áhrif á fleiri en mig og ég bið alla sem urðu fyrir áhrifum innilega afsökunar.“

Eftir hörð viðbrögð sagði Wietrzyk, sem fagnaði sigri í keppninni í Peking, að hún myndi draga sig afturvirkt úr keppni og afsala sér sigrinum.

Wietrzyk sagði: „Ég vil biðja kínversku þjóðina, samkeppendur mína, áhorfendur og skipuleggjendur Hyrox innilega afsökunar á því sem gerðist í keppninni í Peking.“

Hún skrifaði í færslu á samfélagsmiðlum að hún hefði verið „við fulla heilsu“ í upphafi keppninnar og hefði „enga ástæðu“ til að búast við veikindum.

„Þegar ég lít til baka sé ég eftir þeirri ákvörðun að hafa ekki stigið af brautinni. Ég geri mér grein fyrir því að ég hefði átt að taka aðra ákvörðun. Ég tek ábyrgð á ákvörðun minni um að halda áfram og er innilega miður mín vegna þeirra óþæginda og truflunar sem það olli.“