Lúxem­borg á toppi ís­lenska riðilsins

Heimamenn í Búlgaríu byrjuðu með látum og komust í forystuna á átjándu mínútu. Þar var Dimitar Velkovski með frábæra fyrirgjöf sem Asen Chandarov gat lagt þægilega í markið. Eftir að heimamenn fengu forystuna róaðist leikurinn aðeins og sköpuðust ekki mörg hættuleg færi.

Áður en fyrri hálfleikurinn kláraðist náði Leandro Barreiro að jafna metin fyrir Lúxemborg og var staðan 1-1 í hálfleik. Snemma í seinni hálfleik gerðu bæði lið skiptingu þar sem þau reyndu að opna vörn andstæðingsins.

Það gekk loksins á 65. mínútu þegar Vincent Thill kom Lúxemborg í forystuna. Lúxemborg fékk hornspyrnu þar sem boltinn datt fyrir Thill sem kom honum í markið. Eftir markið byrjaði Búlgaría að sækja meira og skapa sér færi til þess að jafna leikinn.

Það tókst þó ekki og endaði Lúxemborg á að vinna góðan sigur á útivelli. Ísland heldur til Lúxemborgar og mætir liðinu ytra á þriðjudaginn og má búast við erfiðum leik. Eftir sigurinn er Lúxemborg á toppi riðilsins og því mikilvægt fyrir Ísland að vinna næsta leik.