Bakgarðsáskorunin: Leitast eftir óprenthæfri hvatningu

Silja Rún Sigurbjörnsdóttir skrifar 7. október 2026 09:03

Vísir stendur fyrir Bakgarðsáskoruninni þar sem lesendum gefst tækifæri á að kynnast landsliðsfólki í Bakgarðshlaupi. Oddur Máni Malmberg er einn þeirra.

Oddur Máni er 34 ára landsliðsmaður í Bakgarðshlaupi. Hann tekur þátt í landsliðakeppninni sem fer fram þann 17. október. Oddur Máni hefur mest farið 31 hring en hlaupið gengur út á að hlaupa 6,7 kílómetra á klukkustund, eins oft og hægt er.

Hvenær byrjaðir þú að hlaupa?

Ég hef verið að hlaupa með pásum frá því um tvítugt.

Af hverju ákvaðst þú að taka þátt í Bakgarðshlaupinu?

Ég var forvitinn hvað ég gæti hlaupið lengi.

Hvað hefur þú tekið oft þátt?

Fimm sinnum minnir mig.

Hvern er best að spjalla við í hringnum?

Þau eru öll ágæt í liðinu. En almennt í bakgarðshlaupum líður mér best með Hansen-tvíburunum, sem eru því miður ekki í liðinu. Svo verð ég líka að nefna Andra Guðmunds, bakgarðshetju, sem er stútfullur af fróðleik og góðum ráðum.

Hvað er best að borða þegar þú tekur þátt í Bakgarðinum?

Appelsínur, ísnálar og Dura kolvetnadrykk.

Hvaða liðsmaður er með besta nestið?

Ég veit ekki alveg hvaða næringu aðrir í liðinu eru með, fyrir utan Frikka — og mér líst ekkert sérstaklega vel á soðnu kartöflurnar hans.

Hvað gerir þú þegar þú ert ekki að hlaupa?

Horfi á fótbolta og æfi golfsveifluna.

Hvað ætlar þú þér að fara marga hringi í október?

Óákveðið, bara einn í einu. Þarf þó að mæta í vinnu á miðvikudegi, þannig ég hætti í síðasta lagi stuttu áður.

Hvað er það vandræðalegasta sem þú hefur lent í í Bakgarðshlaupinu?

Ekkert sem mér dettur í hug.

Hver er uppáhalds Bakgarðsbrautin þín og af hverju?

Öskjuhlíð. Tengist þó frekar því að bakgarðurinn í Öskjuhlíð er hlaupin að vori til frekar en brautin sjálf.

Hvaða liðsmaður kemur mest á óvart í hlaupinu?

Frikki, hann á fullt inni!

Hver er þinn stærsti styrkleiki í Bakgarðshlaupi? En veikleiki?

Er ágætur að hlaupa. Mér þykir frekar leiðinlegt að hlaupa á bakgarðshraða sem veldur því að ég á það til að hlaupa hraðar en skynsamlegt er.

Hvað er það skrítnasta sem þú hefur gert til að halda þér gangandi í hlaupi?

Þegar ég þarf extra hvatningu hringi ég í eldri bróður minn, sem minnir mig á sinn bróðurlega hátt á að hætta að vera aumur. Orðalagið hans er þó ekki prenthæft.

Hver er duglegastur í liðinu við að hvetja aðra áfram?

Það eru allir að hvetja alla.

Ef þú mættir bara hlusta á eitt lag allan tímann, hvaða lag væri það?

Við erum KR.