,,Menn þurfa að bera meiri virðingu fyrir Stjörnunni en þetta”

„Ég man ekki eftir mörgum réttum ákvörðunum. Við vorum mjög slitnir og þetta hefði eiginlega getað orðið talsvert stærra.“

Stjarnan tapaði öðrum leiknum í röð og Brynjar var spurður hvort leikmenn væru mögulega farnir að bíða eftir því að tímabilinu lyki.

„Það er erfitt að segja eitthvað annað eftir þessa frammistöðu.“

Undirbúningurinn hefði þó gefið tilefni til að ætla að liðið myndi mæta betur til leiks.

„Eins og ég sagði fyrir leik, vikan er búin að vera fín. En um leið og dómarinn flautaði leikinn á fann maður fyrir einhvers konar orkuleysi. Menn voru ekki að spila hver fyrir annan og fyrir félagið og það er áhyggjuefni.“

Brynjar sagði leikmenn þurfa að sýna félaginu meiri virðingu þótt liðið væri ekki lengur í baráttu um efstu sætin eða að verjast falli.

„Þetta verða langar tvær vikur ef þetta heldur svona áfram. Ég held að menn þurfi bara að bera meiri virðingu fyrir Stjörnunni en þetta.“

„Þó að við séum ekki að keppa að neinu þá erum við samt enn þá að spila fyrir Stjörnuna og fyrir fólkið hérna í Garðabænum. Þetta var bara ekki boðlegt.“

Þjálfarateymið og leikmenn myndu setjast niður á mánudagsmorgun og ræða hvernig ætti að ljúka tímabilinu.

„Við þurfum bara að setjast niður allir saman og ræða málin, hvernig við viljum gera þetta síðustu tvær vikurnar. Það er eitt að tapa en annað að tapa á þennan hátt.“

„Við þurfum að ákveða þetta saman sem hópur því fólk á betra skilið en þetta.“

Brynjar taldi mögulegt að sigurinn í fyrsta leik neðri hlutans hefði orðið til þess að leikmenn slökuðu á, enda fallhættan þá orðin lítil. Hann lagði þó áherslu á að liðið þyrfti að klára tímabilið almennilega.

„Þetta mót er 27 leikir og við þurfum að klára það almennilega. Það skiptir ekki máli þó við séum ekki að keppa fyrir neitt, það er ekki sjálfsagt að spila fyrir Stjörnuna og þú þarft að sýna það í hverjum einasta leik og á hverri einustu æfingu að þú viljir halda áfram að spila fyrir Stjörnuna.“