Netflix segir upp þúsund starfsmönnum

Oddur Ævar Gunnarsson skrifar 14. október 2026 13:58

Höfuðstöðvar bandarísku streymisveitunnar í Los Angeles. Vísir/Getty

Bandaríska streymisveitan Netflix hyggst segja upp þúsund starfsmönnum sínum eða sex prósent af öllu starfsfólki. Um er að ræða mestu breytingar hjá fyrirtækinu síðan árið 2022 en ástæðan er rakin til áhorfstala sem benda til þess að áhorf hafi staðnað hjá fyrirtækinu á undanförnum mánuðum.

Í umfjöllun Hollywood Reporter segir að Ted Sarandos og Greg Peters forstjórar Netflix hafi tilkynnt starfsfólki um aðgerðirnar í tölvupósti í morgun. Þar segir að það verði einkum starfsfólk á sviði vöru- og tækniþróunar sem muni finna fyrir niðurskurðinum auk starfsfólks í lögfræði- og mannauðsteymi fyrirtækisins.

„Markmið okkar – að skemmta heiminum – er metnaðarfullt og til að ná því þurfum við að sýna aga í því hvar við forgangsröðum starfsfólki okkar og fjármunum,“ skrifuðu forstjórarnir í tölvupóstinum sem bandaríski miðillinn hefur undir höndum.

„Rekstur okkar er sterkur og í vexti og við erum enn á góðri leið með að standast spá okkar fyrir árið í heild. Við munum áfram fjárfesta af krafti á sviðum sem hafa mikil áhrif til að bæta þjónustu okkar og efla enn frekar vöxt og nýsköpun. Það krefst þess að við tökum markvissar ákvarðanir í öllum rekstrinum svo við getum áfram skilað árangri fyrir áskrifendur okkar, samstarfsaðila, starfsfólk og fjárfesta.“

The Hollywood Reporter lætur þess getið að Netflix skili áfram miklum hagnaði og sé enn stærsta streymisveita í heimi. Áhorfstölur hafi hinsvegar staðið í stað undanfarna mánuði sem sé vont fyrir fyrirtækið sem hafi lagt aukna áherslu á auglýsingasölu. Fram kemur að streymisveitan muni birta uppgjör sitt fyrir þriðja ársfjórðung í næstu viku.

Bíó og sjónvarp Bandaríkin Streymisveitur Netflix

Mest lesið

Fleiri fréttir