Leið ekki vel í lokin

Arnór Atlason var bæði hetja og skúrkur í þessum leik. Hann klúðraði tveim góðum færum á lokakaflanum en fiskaði síðan vítið mikilvæga undir lokin. Honum var augljóslega létt í leikslok. "Ég hef spilað stóra leiki áður en þetta er það stærsta hingað til. Ég hefði náttúrulega átt að skora þarna í tvígang en vítið vegur vonandi upp mistökin. Mér leið ekkert sérstaklega vel þegar þeir komust yfir en ég náði að fiska víti undir lokin og það var mikill léttir," sagði Arnór brosandi en innkoma hans var alveg frábær og hann sannaði það að hann er klár í alþjóðabolta.