Owen byrjar tímabilið með Real

Enski sóknarmaðurinn Michael Owen, sem nú er orðaður við annað hvert félag í Englandi, býst fastlega við því að hefja komandi leiktíð á Spáni. Owen skrifar pistla á netútgáfu The Times í Bretlandi og í sínum nýjast pistli greinir hann frá því að forráðamenn Real hafi tjáð honum að koma Robinho og Julio Baptista breyti engu um stöðu hans hjá félaginu. "Á þessari stundu bendir allt til þess að ég hefji leiktíðina í búningi Real en hins vegar tjáðu forráðamenn félagsins mér það að ef það kæmi tilboð sem hentaði öllum aðilum vel þá fengi ég leyfi til að kanna það betur. Þetta er mikilvægt ár, HM er á næsta ári og ég verð að fá að spila reglulega," sagði Owen í pistlinum.