Cole treystir á Rooney

Ashley Cole hefur mikla trú á að enska landsliðið geti gert góða hluti á HM í Þýskalandi næsta sumar og telur Wayne Rooney vera lykilmann liðsins í þeim efnum. "Ég tel að enska liðið sé á réttri braut eftir tapið í Danmörku og varnarleikurinn er að verða betri. Við höfum góða blöndu reyndra og ungra leikmanna og svo höfum við auðvitað Wayne Rooney. Það er mikilvægt að ná að toppa á réttum tíma þegar svona stórmót eru annars vegar og Rooney sýndi hvers hann var megnugur á EM í fyrra. Hann er maður sem getur gert gæfumuninn fyrir okkur og við treystum á hann að vera í hörkuformi á HM," sagði Cole.