Skortur hreinsunarstöðva skýringin

Samtök olíuframleiðsluríkja segja að það sé ekki skortur á olíu sem valdi háu bensínverði heldur skortur á hreinsunarstöðvum. OPEC ríkin eru nú á fundi í Austurríki um hvað þau geti gert til þess að ná eldsneytisverði niður í einhver þolanleg mörk. Komið hafa fram tillögur að auka framleiðsluna um fimm hundruð þúsund föt á dag og einnig um að setja varabirgðir á markað til þess að ná verðinu niður. Olíumálaráðherrar ríkjanna segja hins vegar að þeim sé vandi á höndum því í raun sé enginn skortur á olíu. Það sem skorti sé olíuhreinsunarstöðvar. Tugum olíuhreinsunarstöðva var lokað á suðurströnd Bandaríkjanna eftir að fellibylurinn Katrín gekk þar yfir og ljóst að margar þeirra hefja ekki vinnslu á næstunni. Olíumálaráðherrarnir spyrja því nokkuð eðlilega til hvers þeir eigi að vera að dæla upp meiri olíu, ef ekki er hægt að koma henni á markaðinn. Framleiðslan sé þegar meiri en nægileg til þess að mæta eftirspurn og varabirgðir séu nægar í flestum vestrænum ríkjum. Ráðherrarnir nefna sem dæmi að Bandaríkjastjórn hafi sett þrjátíu milljón tonn af hráolíu úr varabirgðum sínum á markað eftir Katrínu en ekki seldust nema ellefu milljón föt þar sem hreinsistöðvarnar gátu ekki tekið við meiru.