Vieira aðvarar Arsenal

Miðjumaðurinn Patrick Vieira hjá Juventus hefur gefið út aðvörunarorð til fyrrum félaga sinna í Arsenal og segir að félagið verði að bretta upp ermarnar í leikmannamálum ef það ætli sér að halda framherjanum snjalla Thierry Henry lengur í sínum röðum. Henry hefur enn ekki skrifað undir framlengingu á samningi sínum við félagið og margir vilja meina að hann vilji bíða og sjá hvort félagið hafi í hyggju að styrkja leikmannahópinn með markvissum hætti í nánustu framtíð, ella muni hann yfirgefa félagið. "Ég fór til Juventus af því þar á ég miklu betri möguleika á að vinna Evrópukeppnina. Ég þykist vita að Henry er að vonast til að Arsenal styrki hóp sinn frekar, því hann vill ná góðum árangri með liðinu. Í mínu tilviki beið mín bara tilboð frá Juve þegar ég kom heim úr fríinu. Arsenal samþykkti það og ég samþykkti það og ég er ánægður að vera í þessari aðstöðu," sagði Vieira, fyrrum fyrirliði Arsenal.